МВР ја уапси „Генерал Мими“, 34-годишната скопјанка со иницијали М.Џ., која лажно се претставувала како шефица во американката воена база Бондстил на Косово, и нудела вработувања во НАТО, како и можности за бизнис со преставништва на Алијансата.

Од МВР велат дека М.Џ. се товари за 12 кривични дела изршен во периодот од јануари до јуни годинава, при што успеала да измами 12 македонски граѓани, поголем дел од кои биле жители на општина Аеродром. На истите им ветувала вработувања и големи плати, а за возврат ги „олеснила“ за 567.300 денари.

Обвинетата на измамените им ветувала дека во силите на НАТО ќе ги вработи како возачи, административни работници, месари, собарки, кафекуварки и во останатите служби, а на оние кои имале фирми им ветила дека доколку аплицираат во НАТО, ќе им среди тендери за снабдување на базата о храна, средства за хигиена, пијалоци и слично.

На измамените наложила да подготват свое „CV“, потоа со фотокопија од лична карта и две фотографии да платат сума од 6.000 денари со која ќе се покрие лекарскиот преглед, а дури им сугерирала да набават облека од скапи бутици за да изгледаат претставително на интервјуата и истата да ја користат како работна униформа.Откако ќе им ги земела парите, измамничката набрзо исчезнувала, а случајот стигнал дури и до помошникот на генералниот секретар на НАТО, Дирк Бренгелман, кој се распрашувал за истиот за време својата посета на земјава./крај/мф/бс