Локални жители на граничното село Табановце го извршиле нападот над група мигранти на 16 јули со цел да ги оргабат, при што еден мигрант загина, а тројца беа ранети.

Кумановската полиција во саботата соопшти дека во содејство со Секторот за организиран криминал, ги откри сторителите на убиството кое што се случи на 16 овој месец во Табановце и поднесе кривична пријава против Ј.В.(28), Д.П.(24) и С.Л.(28), жители на селото, поради основано сомнение дека сториле кривично дело убиство со умисла. Пријавените во вечерните часови на 15.07.2013 година се договориле да ограбат мигранти кои повремено минуваат крај нивното село во правец на Србија, по што наредниот ден околу 01,30 часот излегле покрај автопатот во Табановце и откако забележале група мигранти, првопријавениот тргнал кон нив и им издал наредба да застанат, по што со ловна пушка сопственост на неговиот татко, во воздух испукал еден патрон, но тогаш групата почнала да бега. Во тој момент некој од групата со камен гаѓал кон напаѓачите при што каменот го погодил првопријавениот во пределот на лицето и тој изреволтиран испукал неколку патрони кон групата, при што го лишил од живот мигрантот кој по потекло е од Бангладеш и ранил три мигранти од Бангладеш и Пакистан. Пријавените веднаш избегале од лице место, по што дошле во куќата на првопријавениот каде што се договориле на никого да не кажуваат за настанот, а првопријавениот веднаш ја исчистил пушката.  По извршен претрес во домовите на пријавените одземени се две ловни пушки. По спроведената истражна постапка од страна на Истражен судија од ОС Куманово на пријавените им е изречена мерка притвор во таење од 30 дена, по што Д.П. и С.Л. се спроведени до затвор Скопје, а првопријавениот се наоѓа во бегство.Третопријавениот е познат сторител на слични кривични дела, во 2011 година е пријавен за разбојништво над мигранти и други кривични дела со елементи на насилство за што е и осудуван. Останатите пријавени се познати сторители на кривични дела од областа на имотните деликти./крај/