МВР заедно со Царинската управа на Македонија во саботата пресече меѓународен канал на недозволена трговија со хероин на релација од Турција преку Грција и Македонија со крајна дестинација западноевропските земји, при што се запленети 2 килограми и 430 грама високо квалитетен хероин, а од слобода се лишени две лица.

Вредноста на наркотичната дрога хероин доколку би се продал на нарко-пазарот во Западна Европа би достигнала цена од околу 300.000 евра.

При преземени координирани мерки и активности во саботата околу 12,30 часот, на граничниот премин „Богородица“ при влез во Македонија, била извршена контрола на патничко моторно возило „Цитроен Ц4“ сопственост на рента-кар компанија од Скопје, управувано од скопјанката А.С.

При контролата во возилото, односно во багажниот простор под тапацирите во фабричките празнини, беше пронајдена сокриена наркотична дрога хероин (спакуван во пет пакувања од по околу половина килограм), по што истиот е одземен и предаден на одделот за крим-техника заради вештачење.

Според досега документираните сознанија, Д.Ф. го организирал транспортот на хероинот, на тој начин што претходно ја ангажирал А.С. како транспортер и и помогнал околу пронаоѓање на патничко моторно возило од рент-а-кар компанија од Скопје за користење за одреден временски период за што дал и паричен аванс.

МВР до јавното обвинителство во Велес ќе поднесена кривична пријава против Д.Ф. и А.С. за сторено кривично дело „неовластено производство и пуштање во промет на наркотични дроги, психотропни супстанции и прекурзори“./крај/со