Обвинението против мене е неосновано, во текстовите во весникот „Репортер 92“ не го открив идентитетот на заштитениот сведок и не сум загрозил ничиј живот и ничие здравје, рече во завршните зборови новинарот на Нова Македонија, Томислав Кежаровски.

„Сведокот јавно призна дека е лажен и дека бил инструиран од полицијата и дека напамет ја научил изјавата којашто му ја напишале во полиција. Јас сум колатерална штета само за да се забошоти самооткривањето на сведокот“, рече Кежаровски.

Обвинителството го товари дека во вториот текст во весникот го објавил телефонскиот број на заштитениот сведок, но Кежаровски тврди дека тоа не бил бројот на сведокот, туку број кој се користел во затворот.

Според Кежаровски, неговите текстови ја откриле вистината за условите во кои работат судовите и непочитувањето на судскиот деловник, а истовремено се и силна критика против работењето на Министерството за внатрешни работи.

„Обвинението против мене не е покренато поради откривање на идентитет на заштитениот сведок, туку за да се открие кој ми го дал записникот и кој ми ги дал информациите од МВР. Господине судија, да бевте на мое место, да бевте новинар, дали ќе ги сокриевте сиве овие информации ако ги имавте“, праша Кежаровски.

Неговите текстови уште на почетокот предвиделе дека случајот „Ореше“ ќе се развие, како што рече, во Драјфусова афера со драматична содржина. „Зошто сега ми се суди мене, а не на оние кои се инволвирани во случајот“ праша Кежаровски.

Тој праша зошто никој од полицијата и од судот досега не го демантирале она што било нашишано во текстовите. „Свесен сум дека му го потопив лажниот авторитет на некој од МВР“ рече Кежаровски.

Нему му се суди за откривање идентитет на лажниот сведок за убиството на старецот од велешкото село Ореше. Златко Арсовски – Бреза пред акцијата „Ликвидација“ си го откри идентитетот и рече дека бил лажен сведок којшто го нашла полицијата и му напишала што да каже.

Завршни зборови дадоа и останатите обвинети кои тврдеа дека обвинението е неосновано. Идната седмица се очекува пресуда за случајот./крај/мф/фф