Полицијата уапси 13 малолетници осомничени дека учествувале во два напади во автобуси на ЈСП Скопје. Инцидентот што се случи во четвртокот во Стајковци се уште не е расветлен.

Осум малолетници од Скопје, селото Батинци, Грчец и Студеничани го нападнале 17-годишниот ученик на улицата „Трета македонска бригада“ во автобус на ЈСП број 33. Без повод и причина го нападнале со тупаници по телото, по што малолетникот завршил во болница.

Другиот инцидент се случил во петокот во автобус на ЈСП број 7, кога поголема група нападнала 15-годишен ученик повторно без повод и причина. Го удирале со тупаници во пределот на главата и рацете, а за овој напад осомничени се петмина малолетници од Скопје, Арачиново, Студеничани и Рашче.

Двајца од напаѓачите учествувале и во двата инциденти, а повеќето од нив и се познати на полицијата и против нив досега се поднесени пријави за кривични дела поврзани со насилство.

Од министерството соопштуваат дека интензивно работат инцидентот што се случи во автобусот на ЈСП број 65 во село Стајковци. Во четвртокот вечерта 10-15 лица маскирани со шалови и со метални шипки нападнаа повеќе патници, а неколкумина малолетници завршија во болница./крај/со/фф