Царинските службеници во четвртокот спречија обид за шверц на марихуанa сокриена во тетрапак сокови на граничниот премин Табановце.

Марихуаната била откриена во автобус кој се пријавил за излез од државата со македонски регистерски таблици, сопственост на превозната компанија oд Скопје, кој сообраќал на вонредна линија Тетово-Берлин.

При царинската контрола, иако сите патници одговориле дека немаат ништо за пријавување, поради сомнително однесување бил проверен еден од патниците, македонски државјанин.

При прегледот на неговата патна торба, покрај личната гардероба пронајдена е и најлон кеса со јадење и два тетрапак сокови со невообичаена тежина, што било индикација за преглад на тетрапак соковите.

При прегледот, во нивната внатрешност пронајдена се три пакувања обвиткани со салотејп трака, наполнети со зелена тревкаста материја од непознато потекло, со тежина од околу 500 грама.

По извршеното вештачење од страна на МВР, утврдено е дека станува збор за марихуана.

Исто така во торбата на патникот пронајдени се и 47 празни зипер кесички кои се користат за пакување и продажба на марихуана.

Осомничениот откако претходно ја набавил марихуаната тргнал од Велес за Скопје, од каде требало да патува за Берлин каде имал намера да остане за да работи, а марихуаната требало да ја пренесе до Берлин-Германија и да ја предаде на лице кое работи во тој град./крај/со