Нема повредени патници во судирот меѓу товарен и патнички воз кај железничката станица „Рајко Жинзифов“, кој се случи во неделата неколку минути пред 18 часот, а со полесни повреди минале машиновозачот и кондуктерот.

Од ударот два вагонa излетале од шините. Лекарска помош на Клиника во Скопје им е пружена на машиновозачот и кондуктерот. Вработени во „Македонски железници“ велат дека тоа е стандардна постапка. Лекарите кај нив констатирале трауматски повреди.

Патниците кои патувале со возот кој сообраќал на релација Скопје – Гевгелија велат дека сѐ се случило многу брзо.

„Не знам што да кажам, сѐ уште сум во шок. Само што тргнавме од станицата, мислам дека возот одеше многу пополека и наеднаш почуствував силен удар. Сите патници реагиравме исплашено кога видов вагон излетан од пругата, сфатив за што станува збот. Страшно“, рече еден од патниците.

„Што да кажам сме имале среќа, во цела несреќа добро поминавме, штом нема жртви, штетата ќе се поправи“, изјавија за порталот Лисица дел од патниците кои биле во возот.

За патниците, но и за надлежните, нејасно е зошто двајцата машиновозачи железничката станица која има три колосека речиси во исто време ја напуштиле.

СВР Велес, екипи на „Македонски желзници – танспорт и инфраструктура“ направија увид на местото. Од него се очекува да се дојде до одговорот која е причината за, како што велат од МЖ, настанатиот вонреден настан.

Патниците кои беа во возот со автобуси беа пренесувани до местото каде што требаше да стигнат со возот кој удри во за среќа како што велат добро упатените, празен товарен воз.

Екипи на МЖ работат на оспособување на проодноста на пругата и се очекува дека во текот на денешниот ден сообраќајот ќе се нормализира./крај/мф