Двајца доктори од Клиниката за уво, нос и грло во Скопје се приведени под сомнение за примање поткуп.

Имено, на почетокот на овој месец од страна на осомничените Ј.Н (45) и Н.П (29) на пациентка од Скопје и се побарани парични средства во износ од 450 евра за да се извршат две хируршки интервенции и тоа функционална операција на носната преграда и естетска операција на нос, а кои средства требало да ги предаде пред да бидат извршени хируршките интервенции.

Пациентката случајот го пријавила во полиција, од каде и биле дадени обележани банкноти, кои во два наврата биле дадени на специјализантката Н.П, а биле наменети за д-р Ј.Н кој требало да ги изврши хируршките интервенции.

При извршен личен претрес на лицето Н.П пронајдени се девет банкноти во апоени од по 50 евра, кои пари претходно биле технички обработени и дадени од страна на пациентката, додека кај лицето Ј.Н, при претрес на неговиот дом и службените простории пронајдени се одредени писмени прибелешки со лица и телефони, список на закажани операции и фотографии кои би можеле да бидат од интерес за кривичната постапка. /крај/со/мф