Црна хроника
Во борбите во Сирија загина уште еден Албанец од Македонија
Алим Османи (22) од Скопје е четвртиот Албанец од Македонија кој загина во Сирија борејќи се на страната на Слободната сириска армија (FSA) против војската на владата на сирискиот претседател Башара ал-Асад, објави порталот на алабански јазик Portalb.
Веста ја потврдиле неговите најблиски кои изјавиле дека Османи заминал во Сирија во средината на минатата 2013 година за да им се придружи на бунтовниците кои се борат против власта на Асад.
„Алим не беше дел од групите блиски на Ал Каеда. Се бореше рамо до рамо со силите на Слободната сириска армија. За жал, нé информираа дека неговото тело не можеме да го добиеме“, изјавиле неговите роднини.
Тој на неговиот профил на Faceboook, на 24-ти декември напишал – „мамо не плачи за мене бидејќи јас не се враќам повеќе, но моли го Бога за мене“.
Османи е четврт Албанец од Македонија, кој го положи својот живот во војната во Сирија.
Во мај 2013 година беше убиен 28-годишниот Расим Зеќири од гостиварското село Беловишта, кој подолго време живеел во Австрија. Осум месеци пред да биде убиен заминал за Сирија и се борел на страната на „Јабха ал Нусра“ односно Фронтот ал-Нусра.
Потоа беше убиен оџата од Скопје, Сами Абдулахи. Тој загинал во жестоките борби меѓу сириските бунтовници и милициите на Курдите во Сирија кон средината на јули кај Рас ал-Аин каде им беше нанесен тежок пораз на борците на движењата Фронтот ал-Нусра во кој според разузнавачки информации се борат и платеници и исламски фундаменталисти од Босна и Херцеговина, јужна Србија, Косово и Македонија.
Што се однесува до регионот, пак, кон крајот на ланскиот февруари загина и 23-годишниот етнички Албанец Мират Ахмети од селото Велики Трновац кај Бујановац, во јужна Србија кој според локалните медиуми бил убиен во борбите во Сирија. Пред да замине на фронтот во Сирија тој бил одличен ученик и успеал да се запише на студии по теологија на престижниот исламски универзитет Ал Ажар во египетската престолнина Каиро, а на сириските бунтовници им се придружил заедно со други негови колеги од трета и четврта година на студиите.
Медиумите претходно јавуваа и за убиени Албанци од Косово, во борбата против режимот на претседателот Башар ал-Асад, а ваквите вести оставија сомнение дека во Сирија има и други групи Албанци кои војуваат против Асад во Сирија.
Според ФТВ на БиХ која се повика на полициски и разузнавачки агенции во мај изминатата година најмалку 70 државјани од оваа земја се бореле на страната на бунтовниците. Од нив 32 лица се вратиле назад, а 20 останале да се борат и натаму. Досега се пријавени шест загинувања на босански државјани на сириското боиште.
Според информациите на босанските безбедносни служби заминувањето во Сирија го организира селефијската заедница од селото Горња Маоча кај Брчко коешто со години се смета за центар на радикалниот вехабизам и во кое владеат строгите шеријатски закони.
Селефијската заедница привлекува радикални исламисти како што беше и Мевлуд Јашаревиќ од српската област Санџак кој во 2011 година изведе терористички напад врз амбасадата на САД во Сараево.
Сите исламски доброволци од Босна и Херцеговина во Сирија се бореле за Фронтот ал-Нусра движење коешто се смета за блиско на глобалната терористичка мрежа Ал Каеда.
Членовите на оваа група изведоа неколку брутални јавни погубувања на припадниците на воените и полициските сили на сириската влада и потоа снимките од овие погубувања ги поставува на интернет.
Кон крајот на април координаторот на Европската унија за борба против тероризмот, Жил Декершов, изјави дека најмалку петстотини Европејци се борат на страната на сириската вооружена опозиција против силите на претседателот Башар ал-Асад . Се претпоставува дека повеќето од европските борци во Сирија доаѓаат од Велика Британија, Ирска и Франција./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Велешанец приведен со 1,62 промили алкохол, нападнал и полицаец
Полициски службеници од СВР Велес ноќеска во 02.10 часот го лишиле од слобода 49-годишниот М.Н. од Велес откако при контрола на ул. „Благој Ѓорев“ утврдиле дека вози со 1,62 промили алкохол во крвта. Откако бил приведен нападнал полициски службеник.
Како што денеска информираат од СВР Велес, при сообраќајна контрола било сопрено патничко возило „рено“ со скопски регистарски ознаки, што го управувал М.Н. и по преземени мерки било констатирано дека е под дејство на алкохол, односно му биле измерени 1,62 промили алкохол во крвта. Тој бил приведен во полициска станица, каде физички нападнал полициски службеник. Известен бил јавен обвинител и по документирање на настаните, против него ќе бидат поднесени пријави по член 297-а и 383 од Кривичниот законик за „безобѕирно управување со моторно возило“ и „напад врз службено лице при вршење работи на безбедноста“, најавија од СВР Велес.
Црна хроника
Почина малолетник, со мопед удрил во бетонски столб
Малолетник починал откако со мопед удрил во бетонски столб во неготинско Тимјаник, информираа денеска од Секторот за внатрешни работи Велес.
– Денеска во ОВР Неготино е пријавено дека во 00:50 часот, во село Тимјаник, неготинско, мопед „лонгија“ со неготински регистарски ознаки, управуван од 17-годишник од село Тимјаник, удрил во бетонски столб. Од здобиените повреди, на местото на настанот починал возачот, а смрт констатирал лекар од Итна медицинска помош Неготино. Увид извршиле јавен обвинител и увидна екипа од ОВР Неготино, соопштија од СВР Велес.
По наредба на јавен обвинител, телото на починатиот малолетник било дадено на обдукција.
Црна хроника
Возач на ауди прегази полицаец и избега
Инцидент се случи вчера во Тетово, кога 28-годишниот Е.А. од село Порој со своето возило „ауди“ удрил во полициски службеник кој се обидел да го запре.
Настанот се случил околу 12:50 часот на кружниот тек кај улиците „Илинденска“ и „Маршал Тито“. Возачот одбил да застане на знакот „стоп“, го удрил полицаецот и избегал, но набрзо бил пронајден и уапсен. На повредениот службеник му е укажана помош во Клиничката болница Тетово.

