Властите во американскиот град Питсбург подигнаа обвинение против вработена во тамошниот ресторан за брза храна од глобално познатиот синџир „McDonald’s“, којашто продавала хероин во комплетите со детски оброк „Happy Meal“.

Како што изјавил за Associated Pres портпаролот на обвинителството на Питсбург, Мајк Манко, 26-годишната продавачка Шанаја Денис била откриена благодарејќи на информации добиени од полициски поткажувачи. Тие на локалната полиција ѝ дошепнале дека бладата жена тргува со хероин директно во ресторанот „McDonald’s“.

За да се купи дрогата доволно било клиентот да се довезе до шалтерот и да ја изговори лозинката „Би сакал да нарачам играчка“. Потоа клиентите ѝ давале пари на Денис и добивале кутии со оброкот „Happy Meal“ во кој наместо храна и играчка имало дрога.

Глумејќи еден од заинтересираните клиенти, полициски службеник ѝ се обратил на Денис барајќи десет „оброци“ хероин, по што таа била уапсена. При претресот биле пронајдени уште 50 оброци со дрогата. При апсењето Шанаја изјавила дека таа не е вмешана во трговијата со дрогата.

Властите, пак, објавија дека хероинот пронајден во пакетите со оброци во ресторанот не е поврзан со хероинот „зачинет“ со фентанил кој се смета дека предизвикал 22 смртни случаи со предозирање во југозападниот дел на сојузната држава Пенсилванија./крај/мф/сн