Во текот на минатата недела и викендот, царинските службеници спречија повеќе обиди за криумчарење стока, при што привремено се задржани златни монети, живи птици, фалсификати, рудни минерали, текстилни производи, обувки, цигари, мобилни телефони, и друго.

На аеродромот Александар Велики, при личен претрес на македонски државјанин кој допатувал со лет од Базел, царината запленила 15 златни монети со ознака Franc.Ios.I.D.G. Avstriae Imperator, со вкупна маса од 160 грама.

Златните монети, заедно со фактура со износ од 7.000 швајцарски франци, издадена од швајцарска банка, пронајдени се во горен џеб од јакната на патникот. Против прекршителот е поднесена кривична пријава.

Царината исто така запленила и 56 живи птици од раса EXOTE, откриени на граничен премин Табановце, при контрола на автобус со српски регистарски таблички, што сообраќал на релација Белград – Атина.

Птиците се пронајдени во багажниот простор на автобусот, во 2 кафези сместени во црна најлонска кеса, сопственост на српски државјанин, патник во автобусот.

На граничниот премиер Деве Баир пак, при контрола на патничко возило со полски регистарски таблички, управувано од полски државјанин, царината открила 166 килограми природни рудни минерали.

На прашање на царинските службеници, возачот објаснил дека со неговите пријатели биле на туристичко патување низ Македонија и Косово и дека немаат што да пријават за царинска контрола.

При контрола на возилото, под патосниците, под предните седишта, под тапацирот во багажникот на возилото, во внатрешноста на тетрапак опаковки од сокови и разни делови од облека, сместени во патни торби, царинските службеници пронајдоа разни ретки природни рудни минерали./крај/мф/бс