Двајца вработени во Македонски шуми барале поткуп од две лица за да не им напишат пријави за сечење на нежигосувани дрва во село Парагуша.

Во саботата (15 март) откако двајца браќа влегле со натоварени нежигосани дрва на коњи во нивниот двор во село Пагаруша, биле забележани од страна на Н.Д. и И.К – вработени во Македонски шуми, подружница Шумско стопанство “Караџица” кои, за да не им напишат пријава и да им ги земат дрвата, побарале од браќата да им дадат 100 евра, односно на двајцата да им се даде по 50 евра. Оштетените им кажале дека моментално немаат и дека за нив тоа се многу пари. По ова Н.Д. во повеќе наврати телефонски му се заканувал на едниот брат дека ако не им ги даде парите, од нивна страна ќе му биде пишана соодветна пријава.

Поради тоа што заканите не прекинувале, едниот од браќата случајот го пријавил во полиција.

Следниот ден, откако Н.Д. телефонски побарал од оштетениот да се сретнат во населба Драчево за да му ги даде парите, се договориле истиот ден да се најдат со него и откако им биле дадени бараните пари, од страна полициски службеници од Единицата Алфи по примањето на поткупот, лицата биле лишени од слобода.

Полицијата поднесе кривична пријава против Н.Д.(50) и И.К.(51), двајцата од Скопје, заради постоење на основано сомнение дека сториле кривично дело „примање поткуп”, а од страна на судија во претходна постапка на И.К. му е одредена мерка притвор во траење од 30 дена, додека на Н.Д. му е одредена мерка домашен притвор во траење од 30 дена.

Двајцата пријавени се веќе познати на полицијата и тоа во периодот 2008/2011 година против И.К. се поднесени две кривични пријави за сторени кривични дела „злоупотреба на службената положба и овластување” од кои за една во 2009 година му е изречена условна осуда затвор, додека против Н.Д. во 2009 година е поднесена кривична пријава за сторено кривично дело „злоупотреба на службената положба и овластување”. /крај/мф/сд