Во текот на минатата недела и викендот, царинските службеници открија 3 царински измами и еден акцизен прекршок, како и повеќе обиди за криумчарење стока, при што привремено се задржани девизи, облека, платно, заштитни маски и ракавици, природен лек и фалсификати.

При личен претрес на македонски државјанин, кој управувајќи патничко возило со македонски регистарски таблички се пријавил за излез од државата на граничниот премин Блаце, биле откриени 12.300 евра.

Возачот, не застанувајќи за царинска контрола, се упатил на пасошката контрола, од каде бил вратен назад. На прашање на царинските службеници дали има да пријави девизи, тој изјавил дека со себе носи 14.300 евра, што било утврдено при извршениот личен претрес.

Поради тоа што не поседувал документ за потекло на девизите, на патникот му се вратени 2.000 евра, сума што резидент може слободно да ја изнесе од државата.

При личен претрес на македонска државјанка, која како сопатник во патничко возило со македонски регистарски таблички, управувано од македонски државјанин, се пријавила за влез во државата на граничниот премин Табановце автопат, од страна на мобилните царински тимови биле откриени 6.500 евра.

Во градникот на патничката се пронајдени 16.500 евра, од кои 10.000 евра, износ што резидент може слободно да го внесе во државата, ѝ се вратени.

На царинската испостава Гевгелија откриен е еден обид за избегнување плаќање царински давачки со погрешно тарифирање на стока и еден обид на намерно погрешно тарифирање на стока со цел избегнување на примена на мерки на трговска политика.

Во првиот случај, фирма увозник од Кичево пријавила за увозно царинење стаклени плочки, декларирани во тарифна ознака со стапка за царински давачки од 8 проценти и стапка за ДДВ од 18 проценти, но при физичкиот преглед на стоката, царинските службеници утврдиле дека се работи за мозаик плочки, што според царинската тарифа се распоредуваат во сосема друга тарифна ознака, со пропишани стапка за царински давачки од 5 проценти и стапка за ДДВ од 18 проценти.

Врз основа на новоутврдената состојба, пресметани се дополнителни давачки во износ од околу 34 илјади денари.

Во вториот случај, увозник од Скопје пријавил за увозно царинење влошки и кертриџи за филтри, декларирани во тарифна ознака со пропишани стапка за царински давачки од 5 проценти и стапка за ДДВ од 18проценти.

При контрола на стоката, царинските службеници утврдиле дека дел од стоката, за која согласно царинската тарифа се потребни дозволи за увоз, е погрешно декларирана.

Станува збор за 230 филтри за вода и 44 делови за филтри, за што е потребна согласност за увоз од Агенцијата за храна и ветеринарство, и 12 апарати за чистење на усна шуплина, за што е потребна дозвола за увоз од Биро за лекови, како посебни мерки од интерес на безбедноста и здравјето на луѓето.

Против фирмата увозник се изготвени записници за распоредување на стоката според царинската тарифа и утврдени основи за примена на мерките на трговска политика. Поведена е прекршочна постапка за утврдување на неговата одговорност.

На царинската испостава Скопје 2 откриен е обид за избегнување плаќање увозни давачки, со погрешно тарифирање на стока. Увозник од Скопје пријавил за увозно царинење водоотпорна иверка, декларирана во тарифна ознака со пропишани стапка за царински давачки од 0 отсто и стапка за ДДВ од 18 проценти, но при преглед на стоката утврдено е дека се работи за дрвени оплати за бетонски работи, што се распоредуваат во сосема друга тарифна ознака за што се пропишани стапка за царински давачки од 15 проценти и стапка за ДДВ од 18 проценти.

Врз основа на новоутврдената состојба пресметани се избегнати увозни давачки од околу 145 илјади денари./крај/мф/бс