Црна хроника
На граничните премини запленети девизи, лекови, зеленчук, муниција, рачни часовници …
Во текот на изминатата седмица и викендот, царинските службеници открија повеќе обиди за криумчарење стока, при што привремено се задржани значителен износ девизи, лекови, зеленчук, ловечка муниција, рачни часовници, бижутерија и женски чанти.
Околу 33 илјади швајцарски франци незаконски пренесени се откриени на скопскиот аеродром „Александар Велики”, при личен претрес на македонски државјанин кој допатувал со лет од Цирих и се определил за зелен канал, каде минуваат патници кои немаат што да пријават за царинска контрола. Во внатрешен џеб од палтото на патникот пронајдени се 45 илјади швајцарски франци, од кои, согласно Законот за девизно работење, 12 илјади франци (противвредност на 10.000 евра) му се вратени.
Други непријавени 4.600 швајцарски франци се откриени на граничниот премин Блаце, при личен претрес на македонски државјанин, патник во патничко возило со швајцарски регистарски таблички, пријавено за излез од државата. Во џебовите на панталоните на патникот пронајдени се 1.500 евра и 5.300 швајцарски франци, од кои му се вратени девизи во противвредност на 2.000 евра, износ што резидент може слободно да го изнесе од државата.
Продолжуваат и обидите за нелегално внесување лекови и препарати во земјата, па така 1.620 таблети „Decort” (600 таблети од 0,50 mg и 1.020 таблети од 0,75 mg) се откриени на граничниот премин Богородица, при контрола на патна торба, сопственост на македонска државјанка, која како патничка во автобус што сообраќал на релација Турција – Македонија, се пријавила за влез во државата. Патничката не поседувала никаква медицинска документација или дозвола издадена од Бирото за лекови, што е потребно за внесување на лекови во Република Македонија.
Службениците на царинската испостава Гевгелија, при детален преглед на товарно возило со македонски регистарски таблички, натоварено со зеленчук, пријавен за увозно царинење за фирма увозник од Скопје откриле 1.710 килограми домати. Увозникот не ја опфатил целата стока со приложената увозна декларација, со што се обиде да избегне плаќање увозни давачки во износ од околу 24 илјади денари.
Непријавена ловечка муниција пронајдена во четири кутии, сокриени под задното седиште на возило, односно 60 патрони ловечка муниција од кои 25 патрони од типот „rottweil special” 36, 25 патрони од типот „rio game load c16″ и 10 патрони од типот „rio royal buck 9p”, се откриени на граничниот премин Табановце – автопат, при контрола на патничко возило со македонски регистарски таблички, управувано од македонски државјанин, пријавено за влез во државата.
Модните додатоци сé уште се привлечни за криумчарите, па тала се откриени два одвоени случаи на граничниот премин Блаце, при контрола на две патнички возила пријавени за влез во државата. Во првиот случај при контрола на патничко моторно возило со косовски регистарски таблички, во две женски чанти и една кеса сместени на задното седиште на возилото, пронајдени се 374 машки и женски рачни часовници од различни марки. Непријавените часовници биле сопственост на македонска државјанка, патник во возилото.
Во вториот случај, при контрола на патничко моторно возило со македонски регистарски таблички, управувано од македонски државјанин, во две кеси сокриени под совозачкото седиште на возилото, пронајдени се 254 модни додатоци – бижутерија (ланчиња, нараквици, приврзоци за клучеви и др.).
Дополнителни шверцувани 425 модни додатоци (рачни часовници и женски чанти), се откриени, исто така, во два одвоени случаи на скопскиот аеродром „Александар Велики”.
Во првиот случај, при контрола на патните торби на македонски државјанин, кој допатувал со лет од Малме, Шведска, пронајдени се 340 рачни часовници. Додека во вториот случај, при контрола на патните торби на турски државјанин, кој допатувал со лет од Истанбул, пронајдени се 85 женски чанти./крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Велешанец приведен со 1,62 промили алкохол, нападнал и полицаец
Полициски службеници од СВР Велес ноќеска во 02.10 часот го лишиле од слобода 49-годишниот М.Н. од Велес откако при контрола на ул. „Благој Ѓорев“ утврдиле дека вози со 1,62 промили алкохол во крвта. Откако бил приведен нападнал полициски службеник.
Како што денеска информираат од СВР Велес, при сообраќајна контрола било сопрено патничко возило „рено“ со скопски регистарски ознаки, што го управувал М.Н. и по преземени мерки било констатирано дека е под дејство на алкохол, односно му биле измерени 1,62 промили алкохол во крвта. Тој бил приведен во полициска станица, каде физички нападнал полициски службеник. Известен бил јавен обвинител и по документирање на настаните, против него ќе бидат поднесени пријави по член 297-а и 383 од Кривичниот законик за „безобѕирно управување со моторно возило“ и „напад врз службено лице при вршење работи на безбедноста“, најавија од СВР Велес.
Црна хроника
Почина малолетник, со мопед удрил во бетонски столб
Малолетник починал откако со мопед удрил во бетонски столб во неготинско Тимјаник, информираа денеска од Секторот за внатрешни работи Велес.
– Денеска во ОВР Неготино е пријавено дека во 00:50 часот, во село Тимјаник, неготинско, мопед „лонгија“ со неготински регистарски ознаки, управуван од 17-годишник од село Тимјаник, удрил во бетонски столб. Од здобиените повреди, на местото на настанот починал возачот, а смрт констатирал лекар од Итна медицинска помош Неготино. Увид извршиле јавен обвинител и увидна екипа од ОВР Неготино, соопштија од СВР Велес.
По наредба на јавен обвинител, телото на починатиот малолетник било дадено на обдукција.
Црна хроника
Возач на ауди прегази полицаец и избега
Инцидент се случи вчера во Тетово, кога 28-годишниот Е.А. од село Порој со своето возило „ауди“ удрил во полициски службеник кој се обидел да го запре.
Настанот се случил околу 12:50 часот на кружниот тек кај улиците „Илинденска“ и „Маршал Тито“. Возачот одбил да застане на знакот „стоп“, го удрил полицаецот и избегал, но набрзо бил пронајден и уапсен. На повредениот службеник му е укажана помош во Клиничката болница Тетово.

