Двајца професори во средни училишта во Скопје и Тетово со помош на други лица меѓу кои и еден вработен во МВР фалсификувале уверение за 4,000 евра за потребите на наставник во основно училиште во Скопје кој сакал со лажното уверение да добие диплома од Државниот универзитет во Тетово.

На 22-ри овој месец во СВР Тетово било пријавено кривично дело “фалсификување на исправа“. Според пријавата, истиот ден околу 14 часот лицето А.И. (24), инаку вработен како наставник во ОУ.„Дрита“ во село Копаница Скопје, дошло во ДУТ Тетово  и од референтите на студентската служба на отсекот Филозофски факултет побарало да му биде издадена диплома за завршено високо образование односно за завршен Филолошки факултет со стекнато звање  „професор по англиски јазик“ за што истиот приложил уверение за завршено високо образование наводно издадено во 2013 година.

Референтката на студентската служба се посомневала во веродостојноста и оригиналноста на уверението приложено од страна на пријавениот по што го доставила до секретарот на наведената институција.

По проверките извршени во евиденциите, констатирано било дека наведеното уверение не евидира во ниту една од  евиденциите  на ДУТ Тетово.

Веднаш по добиената пријава, од страна на полициски службеници при СВР Тетово преземени се мерки и активности при што во ДУТ Тетово биле затекнати и приведени лицата А.И., М.А. (30) вработен во СГС Скопје приватно обезбедување и К.А. (33) вработен како  професор во СГГУ „Здравко Цветковски“ во Скопје.

Од обавените разговори, истите признале дека кривичното дело го сториле во текот на октомври 2013 година кога М.А.му ветил на наставникот дека ќе му извади уверение за завршено високо образование за 4,000 евра.

Откако А.И. се согласил, во текот на ноември 2013 година повторно оствариле средба во село Копаница, но овојпат покрај М.А. на средбата бил и професорот од “Здравко Цветковски“. Во таа прилика А.И. им ја дал побараната сума пари од 4.000 евра како и индекс, фотокопии од извод на родени и од лична карта на негово име. Тие му ветиле дека уверението ќе му биде готово за еден месец.

По ова, откако ги зеле парите и документите, М.А. и К.А. се упатиле во Тетово каде требало да остварат средба со М.М.(43) вработен во МВР во Сектор за управно надзорни работи. По пристигнување, К.А. на паркингот во близина на „Културен Дом“ во Тетово на М.М. му го дал пликот со 4,000 евра како и документите на име на А.И. за што им било ветено дека уверението ќе биде готово за еден до два месеци.

Потоа наведените документи со парите М.М. му ги предал на петто лице, Е.Н. (66) професор во Гимназија „Кирил Пејчиновиќ“ во Тетово.

Во текот на полициските активности околу случајот од страна на ДУТ Тетово добиено е известување во кое е наведено дека уверението на име на првопријавениот А.И. е фалсификат. крај/мф/сд