Педесет и петгодишна жена е тешко повредена во сообраќајна несреќа, што се случила вчера утрото на патот Битола – Кичево.

Несреќата се случила кога автомобил „рено меган“, со битолски регистарски ознаки, управуван од А. Ц. (35) од с. Долно Оризари, Битолско, излетало од патот. Во незгодата тешки телесни повреди добила сопатничката В. Ц. (55) од Долно Оризари, констатирани во Клиничката болница во Битола. Извршен бил увид на местото на настанот од екипа на СВР Битола.

Еден човек е тешко повреден кога синоќа, возејќи велосипед, се судрил со автомобил на улицата Алија Авдовиќ во Скопје.

Во незгодата учествувале патничко моторно возило „пежо 308“ со скопски регистарски ознаки, управувано од Л. Р. (26) од Скопје, и велосипед, управуван од Ш. А. (73) од Скопје.

Во незгодата велосипедистот добил тешки телесни повреди, констатирани во комплексот клиники „Мајка Тереза“. Извршен бил увид на местото на настанот од екипа на СВР Скопје.

Полицијата пронајде дрога и оружје во куќа во тетовска Брвеница, а приведени се две лица.

Според информациите на МВР, вчера, при претрес во дом и помошни простории на Д. Ј. (47), биле пронајдени и одземени неколку кеси со марихуана, ловечка пушка, воздушна пушка и повеќе од 40 куршуми во различен калибар. А кај Т. Ј. биле пронајдени и одземени четири куршуми.

Тие биле приведени во полициска станица, а по целосно документирање на случајот, против нив ќе бидат поднесени соодветни пријави.