Реконструкција на Владата нема да има пред партискиот конгрес на владејачката партија ВМРО-ДПМНЕ, кој е закажан за 6 декември. Премиерот Христијан Мицкоски вели дека откога ќе ја стокми партијата, ќе почне да размислува за одредени партиски поместувања во Владата, а набргу ги очекува и новите имиња за испразнетите места во Владата и во институциите по изборите.

„Очекувам за испразнетите места да добијам имиња најбргу што може, да видиме дали тие имиња се апсолутно во рамките на кои очекувам да бидат и тие имиња да ги пополнат испразнетите места во Владата и во институциите. Потоа ќе следува партискиот конгрес, редовен, потоа во рамките на партијата реконструкција и паралелно со тоа ќе почнат размислувањата за одредени ресори, институции и така натаму. Ова ќе биде процес што ќе трае, нема да биде од денес за утре“, рече премиерот Мицкоски денес на поставувањето камен-темелник за нов културен дом во Петровец.

Премиерот денес неколкупати повтори дека тој е мандатар и дека неговата одлука ќе биде последна и посочи дека е подготвен да разговара со сите во рамките на коалицијата откога завршат процесите во партијата.

„Сега сме фокусирани на редовниот конгрес, кој ќе биде на 6 декември во Кавадарци. Потоа, нормално, формирање на партиската структура, извршниот комитет, општинските комитети, другите структури, кои се во рамките на партијата, и во меѓувреме додека сето тоа трае, ќе размислуваме за одредени партиски поместувања во рамките на Владата. Јас сум подготвен да разговарам со секого во рамките на коалицијата, но, се разбира, мандатар сум јас. Нормално е дека последниот збор ќе го имам јас“, рече премиерот Мицкоски.

За Беким Сали, кого „Вреди“ веќе го посочи како кандидат за вицепремиерското место наместо Изет Меџити, Мицкоски рече дека има апсолутно високо мислење.

Ноќеска, околу 1 часот по полноќ, непознато лице влегло во гаража од семејна куќа во скопската населба Бит-пазар, во сопственост на маж кој моментно живее во Италија, соопшти Министерството за внатрешни работи.

Како што наведуваат од МВР, сопственикот на куќата, идентификуван како Е. Р., набргу по инцидентот добил порака со закана во која му било соопштено дека во неговото возило е поставена бомба. По пријавата, полициски службеници излегле на местото и при извршниот преглед кај неговиот автомобил „фиат“, со скопски регистарски ознаки, пронашле рачна бомба „М75“, прицврстена со жица на рачката од возачката врата.

Дополнително, при преглед на друго возило „фиат“, со италијански регистарски ознаки, сопственост на брат му А. Е., кој исто така живее и работи во Италија, во багажникот била пронајдена кутија со 100 куршуми во калибар 7,62 милиметри за автоматско оружје.

Полициски екипи ја обезбедиле локацијата, а бомбата е безбедно отстранета. Се преземаат мерки за целосно расчистување на случајот.

Новиот градоначалник на Скопје, Орце Ѓорѓиевски, денеска го прими уверението и најави дека од вечерва почнува акцијата за чистење на градот.

„Официјално – од денес Скопје испишува нова страница во својата историја
Денешното уверение е симбол на довербата што ми ја дадоа граѓаните на Скопје.
Но, истовремено е и голема обврска да работам одговорно, посветено и силно, со јасна визија, конкретни резултати и многу дела.
Благодарен сум за секоја поддршка, за секој скопјанец што препозна искреност, посветеност и дела зад зборовите“, објави тој.

Ќе бидам градоначалник на сите, најави Ѓорѓиевски, без разлика на верска, национална, партиска или каква било припадност.

„За мене, поделбите не постојат – она што е моја водилка е обезбедување подобра иднина и достоинствен живот за сите.
И тука нема да се штедам. Го имате мојот збор!
Скопје, почитувани, го менуваме од корен!
Уште од вечерва, во 20.30 часот, почнуваме со првата голема акција, а тоа е за 72 часа да го исчистиме Скопје, токму како што ветив.
А утре почнуваме со темелна реорганизација на јавните претпријатија и нормализирање на состојбите во нив за градот, конечно, да функционира како што скопјани заслужуваат. Скопје ќе добие и нови проекти, а некои од нив ги почнуваме во наредните денови – инвестиции во инфраструктурата, образованието, спортот, животната средината, но ја враќаме и транспарентноста – Скопје, конечно, ќе биде отворен град“.