Украинскиот претседател Володимир Зеленски денес изјави дека Киев прави сè за да ја заврши војната со Русија, но дека на крајот одлуката за мир ќе зависи од неговите партнери.

„Ова се едни од најактивните дипломатски денови во годината и многу работи можат да се решат пред Нова година, а ние правиме сè за таа цел, но дали ќе се донесат одлуки зависи од партнерите“, напиша Зеленски на комуникациската платформа Телеграм пред средбата со американскиот претседател Доналд Трамп во Флорида.

Тој додаде дека украинските партнери треба да го зголемат притисокот врз Москва „за Русите да ги почувствуваат последиците од нивната агресија“.

Зеленски, кој доцна синоќа пристигна на Флорида со својата делегација, се среќава со Трамп за да се договори план за завршување на војната во Украина. Тој им се заблагодари на сите што ѝ помагаат на Украина.

Зеленски објави дека за време на средбата во резиденцијата на Трамп во Флорида, планира да разговара за судбината на спорниот регион Донбас во источна Украина, како и за иднината на нуклеарната централа Запорожје.

Depositphotos

Француската актерка Брижит Бардо починала денеска на 91-годишна возраст, пренесе „Гардијан“.

Бардо, француска актерка и пејачка која стана меѓународен секс-симбол, а подоцна ѝ го сврте грбот на филмската индустрија и се посвети на борбата за правата на животните, починала во 91. година од животот.

Меѓународната слава ја стекна со филмот And God Created Woman од 1956 година, кој го напиша и режираше нејзиниот тогашен сопруг Роже Вадим. Во наредните две децении, Бардо беше олицетворение на архетипскиот „секс-симбол“. На почетокот на 1970-тите, таа објави дека се повлекува од глумата и стана сè поактивна во јавниот и политичкиот живот.

Нејзината отворена поддршка за правата на животните со текот на времето беше проследена и со контроверзни изјави за етничките малцинства и јавна поддршка на францускиот крајнодесничарски Национален фронт, поради што беше осудувана за расна омраза.

Родена во 1934 година во Париз, Бардо пораснала во богато, традиционално католичко семејство. Како талентирана танчерка, ѝ било дозволено да студира балет и добила место на престижниот Париски конзерваториум. Паралелно работела како манекенка и во 1950 година, на само 15 години, се појавила на насловната страница на списанието „Ел“.

Манекенската кариера ѝ ги отворила вратите кон филмот, а на една аудиција го запознала Роже Вадим, за кого се омажила во 1952 година, откако наполнила 18 години. По неколку помали улоги, се истакна и во филмот Doctor at Sea од 1955 година, кој беше голем хит во Велика Британија.

Филмот And God Created Woman, во кој ја играше улогата на ослободена тинејџерка во Сен Тропе, го зацврсти нејзиниот имиџ и ја претвори во светска икона. Филмот доживеа голем успех во Франција и во светот и ја лансираше Бардо меѓу најголемите француски филмски ѕвезди.

Во 1960-тите години, Бардо се појави во низа значајни француски филмови, меѓу кои The Truth на Анри-Жорж Клузо, номиниран за Оскар, Very Private Affair на Луј Мал и Contempt на Жан-Лик Годар. Подоцна прифати и холивудски понуди, како Viva Maria! и вестернот Shalako со Шон Конери.

Во интервју за „Гардијан“ во 1996 година, Бардо изјави дека притисокот од славата го доживувала како товар, велејќи дека никогаш не била подготвена за живот на ѕвезда. Од глумата се повлече во 1973 година, на 39-годишна возраст. Потоа целосно се посвети на активизмот за заштита на животните, учествуваше во протести против ловот на фоки и во 1986 година ја основа Фондацијата „Брижит Бардо“.

Украинскиот претседател Володимир Зеленски и американскиот претседател Доналд Трамп ќе се сретнат попладнево на Флорида за да разговараат за планот за ставање крај на војната во Украина.

Зеленски најави дека на средбата во резиденцијата на Трамп на Флорида ќе разговара за судбината на спорниот регион Донбас во источна Украина, како и за иднината на нуклеарната електрана Запорожје.

Украинскиот претседател и неговата делегација пристигнале на Флорида доцна во саботата, соопшти заменик-министерот за надворешни работи на Украина, Сергиј Кислица, на платформата Икс.

Москва повеќепати инсистираше Украина да го предаде целиот Донбас, вклучително и подрачјата кои сè уште се под контрола на Киев.

Зеленски во петокот за „Аксиос“ изјави дека сè уште се надева оти ќе успее да го ублажи американскиот предлог за целосно повлекување на украинските сили од Донбас.

Доколку тоа не успее, целиот мировен план во 20 точки би бил ставен на гласање на референдум.

За да се овозможи такво гласање, Зеленски изјави дека Русија треба да се согласи на 60-дневен прекин на огнот.

„Аксиос“ објави дека американските претставници ја сметаат подготвеноста за одржување референдум за „голем чекор напред“ и знак дека Зеленски повеќе не ја исклучува можноста за територијални отстапки.

Сепак, неодамнешна анкета сугерира дека украинските гласачи би можеле да го одбијат мировниот план.

Киев и Вашингтон се согласија за многу точки, а Зеленски во петокот изјави дека 90 проценти од мировниот план во 20 точки се усогласени.

Но, прашањето кој дел од територијата, доколку воопшто има отстапки, би ѝ бил предаден на Русија, останува нерешено.

Додека Москва бара целосна контрола врз Донбас, Киев предлага замрзнување на линиите на фронтот на сегашната состојба.

Соединетите Држави предложија воспоставување слободна економска зона доколку Украина се повлече од регионот, но сè уште не е јасно како таа би функционирала во пракса.

Depositphotos