Во 13.20 часот вчера во СВР Битола било пријавено дека на регионалниот пат Македонски Брод -Прилеп, на превојот „Барбарос“ се случила сообраќајна несреќа, при што Е.У. (56) од Богданци управувајќи товарно моторно возило „Сканиа“ со гевгелиски регистарски ознаки, во сопственост на правен субјект од Богданци, загубил контрола врз возилото и излетал надвор од патот.

МВР денеска соопшти дека во несреќата од здобиените тешки повреди возачот починал на местото на настанот, а смртта е констатирана од екипа на Итна медицинска помош.

Извршен бил увид од јавен обвинител и увидна екипа од СВР Битола.

Вчера во 18.02 часот во полициската станица Делчево  било пријавено дека на регионалниот пат од село Саса кон Македонска Каменица, кај место викано „Павлиш дол“, Т.С.(49) од Македонска Каменица управувајќи мотоцикл марка „Хамачи“, загубил контрола над мотоциклот и излетал од патот.

Во несреќата Т.С. се здобил со тешки телесни повреди констатирани во Клиничката болница во Штип.

Увид бил извршен од увидна екипа од ОВР Делчево.

Вчера во СВР Куманово било пријавено дека околу 16.50 часот на локалниот пат во  село Љубодраг, кумановско, патничко возило удрило во пешакот С.Н. (53) од село Љубодраг, а потоа возачот го напуштил местото на настанот.

Во несреќата со тешки телесни повреди се здобила С.Н., констатирани во Општата болница во Куманово.

За настанот е запознат надлежен ЈО и бил извршен увид од страна на увидна екипа од СВР Куманово.