На денешното рочиште за грабнувањето и убиството на 14-годишната, Вања Ѓорчевска и убиството на велешанецот Панче Жежовски, Обвинителството прикажа снимка на која, како што тврди, се гледаат Љупчо Палевски-Палчо и Велибор Манев кои со возило „рено кангу“ се враќаат во седиштето на партијата Десна по извршувањето на убиството на Вања Ѓорчевска.

Снимката е од системот „Безбеден град”, а е направена на булеварот „Христијан Тодоровски-Карпош“.

Една од обвинителките изјави дека видеото е снимено на денот на грабнувањето, а возилото се движи од Чаир кон Бит Пазар. Како што тврди Обвинителството, со автомобилот управувал Палевски, а на совозачкото седиште е Велибор Манев.

Видеоматеријалите што ги презентираше Обвинителството се однесуваа на движењето на возилото Цитроен и Рено Кангу на денот на грабнувањето на Вања Ѓорчевска на 27 ноември 2023 година. Цитроенот со кој е грабната Вања во Дебар Маало пред хотелот Парк пристигнува во 6:37. Во 7:29, како што посочи Обвинителството е всушност времето кога е извршено грабнувањето. Заедно со возилото Рено Кангу во 7:49 се гледаат како се движат низ Визбегово кон селото Бразда каде Цитроенот, според Обвинителство е запален околу 9:30. Потоа Реното Кангу само се враќа назад, низ Чаир и во 10:00 часот се паркира пред седиштето на партијата Десна.

Палевски и неговата одбрана негираа, забележувајќи дека од снимките не можат да се препознаат лица и да се тврди дека тоа се Палевски и Велибор Манев.

Следното рочиште е закажано за в петок (7 февруари), кога треба да сведочи и Гоце Трајковски.

Нема договор за минималната плата, но ќе има официјална потрошувачка кошница што ќе ја креираат синдикатите, Државниот завод за статистика, Организација на потрошувачи, како и министерствата за економија и за финансии. Ова е договорено на денешната седница на Економско-социјалниот совет (ЕСС) што се одржа во Владата.

Претседателката на Организацијата на работодавачи Владанка Трајкоска посочи дека телото кое ќе ја дефинира официјална потрошувачка кошница најверојатно ќе се формира на следната седница на ЕСС.

„Нема договор за минималецот. Се дискутираше за минималната синдикална кошничка, но се официјализираше дека ќе има официјална потрошувачка кошница. Сметаме дека ќе биде официјална и институционална, ќе ги дефинира сите точки и ќе ги земе предвид сите потрошувачки елементи релевантни за една кошничка. Се дискутираше на неколку теми, меѓу кои и минималната плата, но имаше само дискусија, без ставови и заклучоци. Сите се стремиме кон ЕУ и она што го истражувавме беше дека ЕК нема директива за потрошувачката кошница. Секоја држава во регионот и ЕУ има и синдикална и кошница што ја формираат институциите и тие се разликуваат драстично, синдикалните се дури двапати поголеми. Тоа се политички одлуки и елементи кои ги користи Синдикатот за свои придобивки и тоа е нивен метод за вршење притисок“,  изјави Трајкоска по седницата.

Според неа, не бил прифатен предлогот Владата да субвенционира дел од социјалните придонеси за да се зголемат платите.

Пред седницата на ЕСС работодавачите рекоа дека е можно минималната плата да биде и повисока од 450 евра ако Владата субвенционира дел од придонесите.

Министерот за правда Игор Филков ја разреши судијката Даниела Алаксовска-Стојановска од членство во работната група за измени на Кривичниот законик, а од која на протестите за смртно прегазената Фросина Кулакова семејството и јавноста побараа одговорност оти го спасила Јованов од затворска казна за претходни дела.

„Денес, се обраќам пред македонската јавност, не само како министер за правда туку како граѓанин и родител, и ги повикувам судовите во сите инстанции, како и Судскиот совет, да преземат дејства со кои ќе се преиспита целиот случај со прерано загинатата Фросина. Ве информирам дека денеска донесов одлука да ја разрешам од членство во работна група во Министерството за правда судијката чие име ја бранува јавноста. Судијката беше дел од работната група која беше формирана во декември 2020 година за измена на Кривичниот законик и беше дел од оптимизираната работна група за брзите измени на Кривичниот законик, со кои очекуваме да се отстранат штетните последици предизвикани во 2023 година. Ова го правам со цел да не се дискредитира процесот кој е почнат за потребните суштински реформи во правосудството. Загриженоста ја упатувам затоа што сметам дека е крајно време надлежните институции да покажат дека се подготвени да преземат мерки со цел лоцирање на виновниците и нивна евентуална одговорност. Одговорност мора да се утврди и тука нема компромиси. Граѓаните очекуваат правда, а институциите се тука да испорачаат брзо, правично и транспарентно“, рече министерот Филков.

Овој случај, според него, е само потврда на податоците за оценка на работата на судовите, кои беа презентирани пред некој ден.

„Токму брзината на постапувањето и корумпираноста беа детектирани како најголем проблем на судството со најниска оценка. Непостапувањето и спороста отвора можност утре да имаме исти или слични случаи“, вели министерот Филков.

Тој апелира до сите политички фактори во државата да не се обидуваат овој несреќен случај да го злоупотребуваат за дневно политички цели и нагласи дека правосудниот систем мора да се менува од корен, однадвор, но и однатре, и најави дека нема да дозволи неказнивост и недопирливост.