Институтот за судска медицина ќе прави нова ДНК анализа или обдукција на телото за коешто грчките органи тврдат дека е на прилепчанката Дениса Маркоска, која мистериозно исчезна на 12-ти септември кај Карпатос, во водите на Егејското Море.

Професорот Алексеј Дума потврдува дека добил одобрување од Министерот за здравство, Никола Тодоров, да се изврши нова ДНК анализа на телото. Тој им дал овластување да постапат по барање на семејството и да направат сé што е во доменот на Институтот за судска медицина.

„Согласно член 275 од Законот за здравствена заштита, ќе се изврши судско-медицинска обдукција на Институтот за судска медицина во Скопје. Министерството за здравство стапи во контакт со семејството и го извести за истото“ соопштуваат од министерството за здравство.

Ова следува откако од Судска медицина рекоа дека не можат да го отпечатат ковчегот без присуство на надлежен орган, а сите институции, обвинителството, санитарниот инспекторат…  се прегласија за ненадлежни и немаше кој да протолкува како да се излезе од правниот лавиринт. Семејството, пак, во очај го чека телото на својата ќерка и бара уште една ДНК анализа, која ќе им го тргне секој сомнеж дека телото е на нивната ќерка.Телото најверојатно ќе стигне во Скопје во среда и веднаш ќе биде однесено на Институтот за судска медицина. Транспортот е во тек, а за да стигне телото од Родос до Скопје требаат 22 часа. Дениса исчезна од бродот „Серинисима“ на кој што работела, на 12-ти септември, додека бродот пловел во водите на Егејското море. Грчките власти почнаа потрага по девојката, која заврши на 4-ти октомври кога беше најдено женско тело во водите на Егејското Море. ДНК анализата којашто ја направија грчките власти била 99,9 отсто сигурна дека пронајденото тело е телото на девојката, но семејството се сомнева и во анализата и во истрагата на грчките органи./крај/мф/ффс