Крвав инцидент се случил во село Гајранци, Пробиштип. Сосед избодел двајца браќа со нож. Со неколку прободни рани во пределот на стомакот, тие итно се пренесени на штипска хирургија.

Причината за кавгата е банална и се сведува на соседски инает околу поставена ограда. Напаѓачот најнапред видел дека оградата му е срушена, па како виновници ги осомничил браќата, и во знак на одмазда им го искршил ветробранското стакло од автомобилот, стои во полицискиот извештај, пренесува „Старплус“ на ТВ Стар.

Според изјава на нападнатите, тие излегле надвор откако слушнале врева во дворот.

„Излегов надвор да видам што се случува и одеднаш комшијата излегува и ме прободува со нож, јас паднав и тогаш дојде и брат ми да види што е и него исто така комшијата го прободе“, кажа Драган Митев, еден од нападнатите.

Браќата тврдат дека она што ескалирало има подолга историја на лоши соседски односи.

„Гаражата ни ја турна, олуците ни ги искраши, во дворот ни влезе и ни ги искрши и борчињата, но никој не презема ништо“, вели братот на Драган, Миланчо Митев, кој исто така беше нападнат.

Сево ова е причина за тензии , но и чувство на несигурност кај двете семејства.

„Како може да не се плашам, ми излегува пред вратата од која што излегува и моето внуче за во градинка, јас од кај да знам дали тој е пијан или трезен“, вели Митев.

Конкретниот случај од вчера е предмет на анализа на полицијата. Таа утврдува кој прв почнал, а по целосно расчистување и документирање на случајот, ќе следуваат и пријави. Во меѓувреме, двајцата браќа и нивните семејства се под полициско обезбедување, а лекарите интервенирале и на санирање на повреди кај соседот, пренесува „Старплус“ на ТВ Стар. /крај/старплус/др

Извор: ТВ Стар