Црна хроника
МВР ги соопшти деталите за синоќешниот инцидент на „Партизанска“
Министерството за внатрешни работи (МВР) во вторникот вечерта остро ги осуди, како што се истакнува во писменото соопшение, обидите за ширење дезинформации и невкусни инсинуации со цел добивање политички поени, а на сметка на девалвирање на професионалноста на вработените во МВР, притоа изнесувајќи ги деталите кои засега ѝ се познати на истрагата.
Од министерството, притоа, се истакнува дека интензивно, професионално и непристрасно се работи на расчистување на настанот од минатата ноќ во кој беше повредено едно лице.
Од МВР ги прецизираат настаните од ноќта кон вторникот, кога беше рането од огнострелно оружје едно лице, а на што според очевидци и медиумите, му претходела автомобилска бркотница и престрелка на булеварот „Партизански одреди“ близу централното подрачја на Скопје.
„Имено, минатата ноќ, непосредно по полноќ, во Ургентниот центар ‘Мајка Тереза’ било донесено лицето Д.Т. со повреди здобиени од огнено оружје. Од страна на екипи на СВР Скопје излезено е на лице место, извршени се разговори со повеќе лица и преземени се неопходните оперативно-технички мерки, при што е утврдено дека околу 23,30 часот на сé уште неутврдено место од страна на непознат сторител со употреба на огнено оружје биле испукани неколку истрели кон повредениот, кој најверојатно се наоѓал во неговото возило, при што сторителот се дал во бегство во непознат правец. Повредениот најверојатно се упатил кон Градската општа болница и движејќи се по булеварот Партизански одреди со своето возило ‘голф 5’ удрил во бетонска жардињера, при што возилото се превртело“, се наведува во соопштението на МВР.
Се посочува дека по инцидентот од страна на случаен минувач кој се движел со своето возило по „Партизански одреди“, била повикана итна медицинска помош и повредениот Д.Т. потоа бил примен во Ургентниот центар, каде поради сериозноста на повредите е извршен оперативен зафат и констатирани се тешки телесни повреди.
Од МВР претходно соопштија и дека во службата 192 немало пријавено пукање, па оти се утврдува каде и кога се случило пукањето и кој стрелал во сега повредениот.
„Повредениот по оперативниот зафат сé уште се наоѓа во животнозагрозувачка состојба“, се додава.
Претходно во вторникот болнички извори изјавија дека повредите се сериозни, но оти засега застреланото лице е во стабилна состојба. Во вторникот, исто така, беше потврдено дека на КАРИЛ лицето било примено со прострелни рани во стомакот, градите и раката, но и дека не бил во контактибилна состојба.
Од страна на СВР Скопје било во меѓувреме известено Јавното обвинителство, кое увидот на лице место го препуштило на увидната екипа на СВР Скопје. По извршениот увид на лице место, возилото е пренесено во кругот на МВР за натамошно вештачење. Од страна на скопската полиција се работи на целосно расчистување на случајот и идентификување на сите инволвирани лица.
Според вообичаената практика, МВР не го сооптшува целоснито идентитет на лица инвовлирани во различни инциденти. Меѓутоа, во јавноста се објавени информациите дека станува збор за 45-годишниот Даниел Трајковски познат како Близнакот од скопската населба Ѓорче Петров. Според медиумските написи, тој претходно веќе во неколку наврати пријавувал обид за напад врз него. Еден од обидите бил минатата година, кога, според пријавата, тој бил пресретнат од црн автомобил марка „пасат“, од каде што сакале да пукаат на него. Во дворот од куќата на Трајковски во 2012 година била фрлена бомба „кашикара“/крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
„Мерцедес“ со германски таблички се преврте на патот Кичево – Гостивар: повредени три лица, меѓу нив и малолетничка
Вчера во 12:50 часот во ОВР Гостивар е пријавено дека на патот Кичево-Гостивар, во близина на „Мавровска раскрсница“, патничко возило „мерцедес“ со германски национални ознаки, управувано од И.Р.(39) од Кичево, се превртело на коловозот.
Во несреќата со тешки телесни повреди се здобил возачот, а со телесни повреди се здобиле 14-годишна сопатничка од с.Стрелци, кичевско и А.В.(24) од Романија, констатирани во Општата болница Гостивар.
Извршен бил увид од увидна екипа од ОВР Гостивар.
Црна хроника
Прегазен пешак во Куманово: пренесен во болница со тешки повреди
Синоќа околу 19.50 часот во СВР Куманово е пријавено дека на ул.„Ѓорче Петров“ во Куманово, патничко возило „фолксваген голф“ со кумановски регистарски ознаки управувано од 27-годишната Н.Т. од Куманово удрило пешакот О.А.(46) од с.Тромеѓа, кумановско.
Во несреќата со тешки телесни повреди се здобил пешакот, констатирани во Општата болница Куманово.
Полицијата соопшти дека е извршен увид од увидна екипа од СВР Куманово.
Црна хроника
Го лажел дека е вработен во суд и дека ќе помогне синот да му биде ослободен од притвор: кривична за скопјанец
СВР Тетово поднесе кривична пријава против Н.З.(41) од с.Бојане, скопско.
Тој се сомничи за сторено кривично дело „измама“.
Имено, во текот на мај 2025 со лажно прикажување на факти, пријавениот довел во заблуда едно лице дека е вработен во суд и дека за одреден износ ќе му помогне неговиот син да биде ослободен од притвор.
Откако изготвиле жалба кај адвокат по притворот, во три наврати му биле исплатени 7.750 евра, но договореното не било исполнето.

