Министерството за внатрешни работи ќе го информира Министерството за правда за да започне екстрадициона постапка за Сулејман Османи кој беше уапсен во понеделникот во Косово, откако им избега на македонските полицајци додека им го покажувал скриеното оружје украдено од караулата во Гошинце.

Судија на претходна постапка во отсуство на осомничениот му е одредил мерка притвор во траење од 30 дена. МВР имаше издадено меѓународна потерница распишана преку Интерпол. Педесет и петгодишниот Османи од селото Брест бил уапсен во село во општина Витина во Косово и кај него бил најден пиштол и муниција.Тој беше уапсен во акцијата во кумановско Диво насеље, меѓутоа успеа да побегне по пропустите направени од полициските службеници на терен, во моментот кога ја посочуваше локацијата на која било сокриено оружјето украдено од Полициската станица Гошинце. Против полициските службеници, задолжени за негово обезбедување од страна на Секторот за внатрешна контрола и професионални стандарди при МВР е започната дисциплинска постапка поради евидентираното непрофесионално постапување.Тој се товари за кривично дело „тероризам“ за учество во настаните во Куманово, но е осомничен и дека учествувал во нападот на Полициската станица Гошинце во кој беше одземена поголема количина на оружје. Инаку, на крајот од април годинава, неколку дена по нападот врз полициската станица за гранична контрола во Гошинце, во претресот во објекти во село Брест, сопственост на осомничениот беа откриени и одземени две автоматски пушки 7,62 мм. со пет рамки и 100 куршуми калибар 7,62 мм. за автоматска пушка, две снајперски пушки 7,9 мм. со три рамки и 20 куршуми калибар 7,9 мм., 10 пиштоли М57-ТТ 7,62 мм. со 22 рамки и 9 куршуми 7,62 мм. за пиштол, футрола за пиштол, една радио станица со два полначи, маскирна униформа со ознаки од „УЧК“, како и делови од облека, и други предмети. Беше утврдено дека запленетото оружје е дел од оружјето одземено при нападот на полицискиот објект./крај/мф/ффс

Извор: Макфакс