Основното јавно обвинителство Скопје поднесе предлог за издавање казнен налог против вкупно 12 лица за непостапување според здравствените прописи за време на епидемија од член 206 став 1 од Кривичниот законик.

Обвинетите не постапиле според прописите и наредбите со кои се определуваат мерки за сузбивање и спречување на ширењето на заразната болест Ковид-19. Тие не ја почитувале одлуката на Владата за забрана на групирање на повеќе од 5 лица на јавни површини.

Надлежниот јавен обвинител предложи на секој од обвинетите да му биде изречена парична казна од по 100 дневни глоби, при што висината на една дневна глоба да биде определена на 20 евра во денарска противвредност.​

Пешак доби тешки телесни повреди кога во него удрил автомобил.

Од МВР информираат дека настанот се случил вчера на улицата Исеин Акиоски во Кичево.

„Патничко возило ‘форд ескорд’, со охридски регистарски ознаки, управувано од С. Д. (21) од Кичево, удрило во патничко моторно возило ‘опел вектра’, со охридски регистарски ознаки, паркирано од М. О. (43) од Кичево, а потоа и во пешакот М. Ш. (60) од Кичево и во патничко возило ‘опел астра’ со кичевски регистарски ознаки, паркирано од В. Ш. (32) од Кичево. Во незгодата пешакот добил тешки телесни повреди, констатирани во Медицинскиот центар Кичево, каде што бил пренесен за укажување лекарска помош. Извршен бил увид на местото на настанот од екипа од Полициската станица Кичево“, велат од МВР.

Жена од селото Драчевица, Скопско, која била бремена во шестиот месец, вчера пријавила дека додека била сама дома, родила мртво бебе.

Од лекар од итната медицинска помош кај новороденчето била констатирана смрт, без траги на насилство, информираат од полицијата.

По наредба на јавен обвинител, телото е дадено на обдукција.