Полицијата досега не лоцирала униформирани лица, припадници на т.н. гарда на Илирида, изјави во вторникот министерката за внатрешни работи, Гордана Јанкулоска.

Министерката апелираше претставниците на медиумите да бидат прецизни во пренесување на изјавите на официјалните лица на МВР, затоа што информацијата од СВР Тетово беше дека е примена таква пријава.„Во моментот кога е примена пријавата, веднаш се преземени сите дејствија кои се соодветни на една ваква ситуација и доколку се случи да бидат лоцирани такви лица, што до моментот не се случило, ние ќе пристапиме кон спроведување соодветни мерки за нивно лишување од слобода. Доколку утврдиме постоење на какво и да е прекршување на законот, ќе биде поднесена соодветна пријава“ изјави Јанкулоска.Министерката не даде подетални информации за мерките што ги преземаат во врска со преземањето на одговорноста од страна на ткн Ослободителната народна армија, за пукањето што се случи на 28-ми октомври кон објектот на Владата, поради професионални причини.„Ве уверувам дека сé што е во рамки на нашите законски надлежности, и што ни стои на располагање како алатка за откривање на какви било состојби во општеството кои се во интерес на безбедносните служби, ќе биде применето“ додаде Јанкулоска.Изминатиот период се појавија информации и имаше пријави во полицијата дека во реонот на Тетово и Скопје патролираат униформирани лица од ткн  гарда на Илирида, а ова го тврдеше и заменик министерот за внатрешни работи, Земри Ќамили. Тој изјави дека лица во црни униформи легитимирале и заплашувале граѓани во тетовско, според пријави на граѓани.Минатата седмица со соопштение Ослободителната народна армија ја презеде одговорноста за пукањето кон Влада, со образложение дека во Македонија не се почитува Охридскиот рамковен договор./крај/мф