Три лица се приведени, додека по три лица полицијата сè уште трага во врска со пукањето во скопско Арачиново во неделата попладне, а во кое беа повредени четири лица. 

Причините за инцидентот се нарушени меѓучовечки односи меѓу двете страни. 

Според информациите на МВР, вчера околу 16,30 часот додека Џ.Б.(30) и Џ.Б.(46), двајцата од село Арачиново, седеле во ресторан „Сити“ во Сингелиќ, забележале дека ги следи А.С.(23) од истото село, со кого претходно имале нарушени меѓучовечки односи. 

Откако двајцата со автомобил „мерцедес“ пошле во правец кон село Арачиново, патот им бил попречен од две возила, според кажување на оштетените “голф” и “опел зафира” од кои едното управувано од А.С, а другото веројатно од Б.С.(40) во кои имало повеќе лица кои пукале кон „мерцедесот“. 

Џ.Б. и Џ.Б. успеале да стигнат до нивната куќа во Арачиново од која што излегле нивни роднини кои со камења започнале да фрлаат кон „голфот“ и „опелот“. 

Лицата од автомобилите тогаш отвориле оган кон М.Б.(19), Н.Б.(23), Ф.Б.(28) и Р.Б.(53) при што ги раниле. 

Повредените се хоспитализирани во Градската болница „Свети Наум Охридски“, а Н.Б. во Клинички центар Скопје.

Како што информира МВР, напаѓачите се идентификувани, а приведени се Н.С.(50), Р.С.(45) и Г.С.(42) од село Арачиново, додека по уште три лица МВР сè уште трага. 

По целосно документирање на случајот против лицата ќе биде поднесена кривична пријава за сторено кривично дело „убиство во обид”.крај/мф/сд