Пет лица се притворени, а при претреси на објекти и домови во Скопје и во Кавадарци, запленети се околу 4,5 килограми марихуана, одземени околу 12.000 евра и 0,12 грама и 0,15 грама прашкаста кристална материја стимуланс – МДМА  и 2 таблети МДМА, во полициската акција со кодно име „Мрежа“, во која е разбиена криминална група која набавувала и дистрибуирала марихуана и други видови наркотици во неколку градови во земјата.

Како што информираа од Министерството за внатрешни работи во понеделникот, акцијата започнала кога полицијата добила сознание дека првоосомничениот го ангажирал неговиот син, пред нивниот дом во селото Морани да ги пречека лицата трето и четвртоосомничените со наркотичната дрога марихуана, да ја измери тежината на истата, како и да ги подготви и исплати сума од 13.000 евра.

Откако со автомобил „сеат кордоба“ со скопски регистарски ознаки, пристигнале добавувачите, во дворот од куќата каде што живеат таткото и синот кои сакале да ја набават дрогата, двајцата ја извадиле марихуаната и ја измериле на вага за мерење на наркотична дрога, која потоа синот ја сокрил во дрвен сад кој се користи за чување на сточна храна, а добавувачите останале да го чекаат првоосомничениот во неговата куќа.

Поради постоење на основи на сомнение дека ќе се пронајде наркотична дрога или други предмети кои потекнуваат од кривично дело, по претходно обезбедена наредба од судија во претходна постапка извршен е претрес во објект кај првоосомнилчениот 47-годишниот Р.А.(47) од Скопје, при што се пронајдени и одземени околу 4 килограми растителна материја (најверојатно марихуана), вага за мерење на наркотични средства и околу 5.000 евра во различни валути (денари, евра и долари), додека кај неговиот син, 20-годишниот К.Б. се пронајдени и одземени се околу 8.000 евра во различни валути.

По извршениот претрес и преглед врз лицата, исто така, со потврда за привремено одземени предмети одземени се две патнички возила, повеќе телефонски апарати и СИМ картички.

Веднаш потоа, извршен е претрес и во стан на улицата „Драга Стојанова“ во населбата Кисела Вода, кај Ј.С., жителка на Прилеп со живеалиште во Скопје, којашто во договор со Р.А. набавила дрога поради натамошна препродажба по негови инструкции. При претресот понајдени се 20 зипер мали ќесички со растителна материја зелена боја; eдна дигитална вага, една поголема зипер ќеса во која има 6 помали зипер ќеси со растителна материја со зелена боја, 9 поголеми полиетиленски паковања со растителна материја со зелена боја, остатоци од растителна материја со зелена боја, 115 празни зипер ќесички, една кутија цигари „West“ во која има 11 рачно направени цигари исполнети со растителна материја со зелена боја, едно полиетиленско ќесе во кое во хартија има две таблети со сина боја, едно полиетиленско мало паковање во кое има остатоци од таблети и прашкаста материја сина боја од непознато потекло, едно полиетиленско мало паковање со прашкаста материја со бледо жолта боја, мобилен телефон марка марка “HTC“ со сим картичка и една мемориска картичка со натпис „Scndise Vetra 32G3“. Таа, според сомненијата по инструкции од Р.А., имала намера набавената дрога да ја препакува и препродава на наркозависници со кои контактирала.

Во дополнителните истраги и мерки бил полициски опсервиран и 25-годишниот М.А. од Кавадарци за кого, исто така, постоеле сомневања дека врши препродажба на дрога за сметка на Р.А. и на тој начин се стекнува со лична имот корист задржувајќи дел од паричните средстава. При претресот пронајдени се траги од марихуана, додека осомничениот и други предмети од интерес на службата не се понајдени. Одземената растителна материја е предадена во Одделот за криминалистичко-технички испитувања и вештачења при МВР, за натамошно вештачење.

Во текот на спроведувањето на повеќемесечната истрага против организирана криминална група инволвирана во недозволена трговија со дрога, полицијата обезбедила материјални докази против пет лица, членови на криминалната група, за кои постои основано сомнение дека истите биле инволвирани во нелегална трговија со наркотични средства. До Основното јавно обвинителство за гонење организиран криминал и корупција поднесена е кривична пријава против Р.А.(47), К.Б.(20), И.И.(57) и С.А.(21) сите од Скопје, и Ј.С.(25) во Прилеп, а престојува во Скопје за сторено кривичното дело „Неовластено производство и пуштање во промет наркотични дроги, психотропни супстанции и прекурсори” предвидено и казниво по член 215 став 3 од Кривичниот законик на Македонија.

Досега во рамки на акцијата „Мрежа“ се откриени повеќе од 170 лица кои се товарат за нелагална трговија со наркотици, а запленети се над 520 килограми разни видови дроги./крај/мф/сн

Извор: Макфакс