Полицијата во Штип поднесе кривична пријава против Е.З. (38) од овој град, поради сомнение за кривичното дело „оштетување и неовластено навлегување во компјутерски систем“.

Според пријавата, на 4 септември 2025 година во Штип, осомничениот без дозвола и согласност ја користел банкарската картичка на 75-годишна жена од Штип и неовластено извршил трансакции на банкомат.

Случајот е целосно документиран и проследен до надлежните органи за понатамошна постапка.

Полицијата вчера го приведе Е.А.(27) од струшкото село Франгово во врска со убиство во обид сторено на 16 авгиуст во Струга.

„Со решение од Основниот суд во Струга, него определена му е мерка притвор во траење од 30 дена, по што е пренесен во Казнено поправната установа „Затвор“ Охрид“, соопшти СВР Охрид.

Инцидентот се случил пред угостителски објект во Струга, кога осомничениот заедно со уште едно лице го нападнал Н.Д. (30) од село Велешта, употребувајќи остар предмет.

СВР Струмица до Основното јавно обвинителство Струмица поднесе кривична пријава против правно лице од Струмица и А.З.(46) од Струмица, сопственик и управител на правното лице, поради основи на сомневање дека во три наврати сториле кривично дело „даночно затајување“.

Пријавениот правен субјект како даночен обврзник, а А.З. во својство на управител на правниот субјект, во 2023 година избегнувајќи законска даночна обврска пријавиле помал излезен данок во вкупен износ од 1.986.083 денари, со што постапиле спротивно на одредбите од Законот за додадена вредност.

Исто така, правното лице како даночен обврзник и управителот не пресметале и не уплатиле данок на личен доход во вкупен износ од 3.888.722 денари.

Воедно, при извршена контрола од Управата за јавни приходи во финансиската документација констатирани се непризнаени расходи, со што довело до зголемување на даночната основа за данок на добивка за 2023 година во вкупен износ од 3.889.072 денари.

Со ваквите дејствија пријавените во 2023 година го оштетиле Буџетот на Р.С. Македонија во вкупен износ од 9.763.877 денари.