По повеќе од една година, во Македонија е екстрадиран, 33 годишниот Метин Ислами од Скопје, познат како „Командант Талибани“.

Тој беше преземен од косовската полиција на граничниот премин „Блаце“, со највисок степен на полициско обезбедување и согласно процедурите спроведен во затворот Идризово.Метин Ислами минатото лето беше приведен на Косово во близина на Пеќ, откако претходно по него беше распишана меѓународна потерница преку Интерпол заради издржување на казна затвор. По основ на правосилна судска пресуда од 2008 година, изречена во отсуство, Метин Ислами беше осуден на 15 години затвор за сторени кривични дела, “терористичка организација”  и за “недозволено изработување, држење и тргување со оружје или распрскувачки материи”.Тој беше осомничен како еден од членовите на терористичката група, предводена од Лирим Јакупи – Нацист, којашто во ноември 2007 година во тетовското село Бродец беше разбиена во полициската акција “Планинска бура“. Во акцијата, при нападот врз полициските сили седуммина терористи ги загубија животите, додека 12 беа приведени. Четири члена на групата предводени од Лирим Јакупи, меѓу кои и таканаречениот „Командант Талибани“, успеаја да избегаат на Косово./крај/мвр