Синоќа по полноќ во полиција било пријавено дека на локалниот пат меѓу селата Стојаково и Богородица, се случила сообраќајна незгода во која починал 54-годишник од Стојаково.

Според информациите, тој управувал автомобил „сеат леон“, со гевгелиски регистарски ознаки, во кој како сопатник се превезувала и неговата сопруга, и во еден момент излетал од патот.

Откако пристигнала екипа на Итна медицинска помош тој починал.

Од страна на екипа од полициската станица Гевгелија извршен бил увид на местото на незгодата, а по наредба на Јавен обвинител телото на починатиот било дадено за обдукција.

Во регионот на Кавадарици синоќа и рано утрово се случиле две одделни сообраќајни несреќи во кои животите ги загубиле двајца трактористи на возраст од 33 и 69 години.

Синоќа, околу 21.15 часот на регионалниот пат Кавадарци – село Росоман се случила сообраќајна несреќа помеѓу автомобил „пежо“ управуван од П.М. (38) и трактор, управуван од М.З. (33), двајцата од Кавадарци.

Во незгодата починал возачот на тракторот, а возачот и сопатничката од автомобилот се здобиле со телесни повреди.

Втората незгода се случила рано утрово (9 јули), а во полиција било пријавено дека на влезот во Кавадарци, 69-годишник, управувајќи трактор, изгубил контрола и се превртел, при што починал на местото.

Во вечерните часови на 8 јули на регионалниот пат Валандово-Струмица, пред крстосницата за село Раборци, се превртело комбе „мерцедес спринтер“, со битолски регистарски ознаки, во кое биле превезувани 50 мигранти од Индија, Авганистан и Пакистан.

По незгодата возачот побегнал од местото.

Како што информираат од МВР, со тешки повреди се здобиле четворица мигранти, а 10 се здобиле со полесни повреди, констатирани во медицинскиот центар Струмица, каде што биле пренесени за укажување на лекарска помош.

Останатите мигранти биле пренесени во Прифатниот центар Гевгелија.

Увид на местото на незгодата извршиле Јавен обвинител и екипа на СВР Струмица и се работи на расчистување на случајот.

*Фотографијата е илустрација, а не од конкретниот настан