Црна хроника
Бошкоски: Обвинителството да одговара за изживување и малтретирање
Поранешниот министер за внатрешни работи, Љубе Бошковски, кој е меѓу обвинетите во случајот ’Ровер’, во понеделник на повтореното судење во Основниот суд 1 Скопје побара обвинителството да одговара за изживување и малтретирање на лица кои не можат да се бранат, алудирајќи на тоа дека две години, како што рече, без докази, обвинетите се во притвор.
Повтореното судење за случајот ’Ровер’, во кој девет лица минатата година беа осудени на затворски казни за убиството на Марјан Тушевски и Киро Јанев во 2001 година, почна во понеделник откако Апелациониот суд во мај ја укина првостепената пресуда наведувајќи дека таа е нејасна и неразбирлива, како и дека се направени пропусти и повреди на Законот за кривична постапка.
Обвинителката Лидија Раишковиќ Вучкова рече дека останува на обвинението без никакви измени, а Бошковски и останатите обвинети повторно се изјаснија за невини. Четворица, од вкупно девет обвинети, кои се и директни извршители на убиството се српски државјани и истите се во бегство.
Екс министерот рече дека станува збор за политички монтиран процес и побара тој повеќе да не присуствува на судењата затоа што, како што рече, и онака пресуда ќе биде донесена надвор од судот. Бошковски побара другите обвинети да бидат ослободени затоа што, рече, тие биле колатерална штета на идејата за негово апсење.
Во неговиот исказ рече дека обвинителката Лидија Раишковиќ Вучкова и судијата Илија Трпков ќе се срамат од своите постапки и дека ниту платата ниту дневницата нема да ја исперат нивната свест.
Во образложението на Апелациониот суд за отфрлање на првостепената пресуда се бара точно утврдување на умислата на секој од обвинетите за стореното кривично дело како и докажување на нивната вина со докази. Исто така, се бара првостепениот суд со сигурност да утврди за секој обвинет кој какво дејство презел со конкретен опис на дејствијата.
Со првостепената пресуда на доживотен затвор како директни извршители на убиството, во отсуство, беа осудени Србите Предраг Чубрило, Милан Илиќ, Милорад Ковачевиќ и Вук Вукичевиќ. Љубе Бошкоски беше осуден на 12 години за помагање, а на 10 години затворска казна беше осуден неговиот шеф на обезбедување Зоран Трајковски. По осум години добија Сашко Јовановски и Ивица Ристиќ, а по шест Гоце Митревски и Никола Негриевски.
Марјан Тушевски, познат скопски рекетар со богато полициско и судско досие, и неговиот личен возач Киро Јанев беа застрелани пред 13 години пред кафуле во скопската населба Тафталиџе.
Инаку, Бошковски веќе издржува петгодишна затворска казна во КП Идризово за случајот „Кампања“ за нелегално финансирање на изборната кампања во 2011 година.крај/мф
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Инспектори затекнале диви менувачници на Бит-пазар и им дозволиле да работат, кривична за шест лица
Единицата за економски и компјутерски криминал при СВР Скопје поднесе кривична пријава против шест службени лица – инспектори, вработени во Државен пазарен инспекторат, и тоа: С.Б.(32), Ј.Р.(54), В.М.(47), Б.С.(46),С.С.(61) и Р.Б.(37), сите од Скопје, за сторено кривично дело „злоупотреба на службена положба и овластување“ од чл 353 од КЗ на РСМ, соопшти денеска МВР.
Во текот на март и април 2023 година, преземајќи службени дејствија и вршејќи контрола кај три објекти обележани како менувачници, лоцирани во близина на Бит Пазар, Скопје, за кои било утврдено дека не биле регистрирани како правни лица и не поседувале лиценци издадени од НБРМ за вршење менувачко работење, а подолг временски период работеле како менувачници, пријавените, како што стои во соопштението, согласно Законот за забрана и спречување на вршење на нерегистрирана дејност согласно кој истите сами навеле дека постапуваат, на затекнатите лица во дивите менувачници биле должни да им изречат решение за забрана за вршење на дејност, да им ги запечатат објектите, да им ги одземат предметите, опремата и средствата со кои е направен прекршокот, како и да им изречат глоба во износ од 1000 до 20.000 евра во денарска противвредност.
– Но, пријавените пазаришни инспектори ги прекршиле сите одредби од наведениот закон и во три извршени вонредни инспекциски надзори на затекнатите лица во сите три објекти како менувачници, ниту им издале решение за забрана за вршење на нерегистрирана дејност, ниту им ги запечатиле просториите каде што ја вршеле противзаконската активност, ниту им ги одзеле средствата, предметите и опремата со кои е направен прекршокот ниту пак им изрекле глоба во износ од 1.000 до 20.000 евра. Напротив, во сите три извршени вонредни надзори на сите три менувачници на секој од сопствениците им изрекле еднократна парична глоба во износ од 80 евра во денарска противредност и ги оставиле и понатаму менувачниците редовно да работат, со што постапиле спротивно на законот за забрана и спречување на вршење на нерегистрирана дејност и со неизвршување на својата службена должност го сториле кривичното дело „злоупотреба на службената положба и овластување“, појаснуваат од МВР во соопштението.
Црна хроника
Крадел во викенд-куќа во Берово: уапсен 36-годишен маж
Вчера, во 18.40 часот, во викенд-куќа на улицата Туристичка во Берово, полициски службеници од Полициската станица Берово го лишиле од слобода Б. Ч. (36) од Берово.
Тој бил затекнат при извршување кривично дело тешка кражба од викенд-куќата, од каде што одзел повеќе предмети.
Бил задржан во полициска станица и во службен разговор признал уште едно кривично дело тешка кражба од друга викенд-куќа.
Некои од одземените предмети биле пронајдени и вратени на оштетените граѓани. По комплетирање на случаите, против Б. Ч. ќе бидат поднесени соодветни пријави.
Црна хроника
Двајца уапсени, пукале пред кафеана во Охрид
Денеска, во 00.15 часот, пред угостителски објект во охридската населба Чекоштина, полициски службеници од СВР Охрид ги приведоа 67-годишниот К. Б. и 37-годишниот М. П., двајцата од Охрид, извести СВР Охрид.
„Тие претходно го нарушиле јавниот ред и мир со пукање во воздух од пиштол ‘радом’ во калибар од 9 милиметри, сопственост на М. П.“, велат од СВР Охрид.
Пиштолот е одземен и по целосно документирање на настанот, против нив ќе биде поднесена соодветна пријава.