Црна хроника
Двајца прилепчани осомничени за подметнат пожар, третиот е во бегство

Двајца мажи од Прилеп и еден од селото Ореше се сомничат дека со употреба на запалива течност намерно предизвикале пожар кој целосно уништил викенд куќа кај село Капиново, општина Чашка.
Како што соопшти Министерството за внатрешни работи, СВР Велес поднело кривична пријава до Основното јавно обвинителство против Ѓ.П. (56) од Ореше и двајцата прилепчани – С.М. (40) и Д.Д. (37), поради сомнение за сторено кривично дело „предизвикување општа опасност“.
Пожарот се случил на 10 мај 2025 година, околу 10:35 часот, кога било пријавено дека гори викенд куќа сопственост на 32-годишен жител на Скопје. Интервенирала екипа на Територијалната противпожарна единица од Велес и пожарот бил локализиран без повредени лица.
„По спроведена истрага, утврдено е дека тројцата осомничени дошле со возило со прилепски таблички, насилно влегле во објектот и подметнале пожар со запалива течност. Куќата била целосно уништена“, информираат од МВР.
Ѓ.П. и Д.Д. се лишени од слобода на 16 мај и се задржани во полициска станица, додека се преземаат мерки за лоцирање и приведување на С.М., кој сè уште е во бегство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Кривична пријава за штипјанец – отрул две кучиња, а едно усмртил со автомобил

Полицијата поднесе кривична пријава за штипјанец – отрул две кучиња, а едно усмртил со автомобил.
Според информациите на МВР, полицијата поднесе кривична пријава против С.К.(72) од Штип поради постоење основи на сомнение за сторени кривични дела „убивање и мачење животни“.
На 14.04.2025 во с. Долно Трогерци, штипско, пријавениот во два наврати фрлил храна со отров, од што биле отруени две кучиња во сопственост на Т.С..
Исто така, на 06.07.2025 пријавениот, со патничко возило усмртил куче.
Црна хроника
Откриен незаконски лов на белвици во Охридското Езеро

Синоќа во периодот од 02.00 до 04.00 часот, полициските службеници од Полициската станица за граничен надзор „Охридско Езеро“, извршија засилени контроли во водите на Охридското Езеро со цел спречување на незаконит риболов.
Притоа, на подрачје на Струга и струшкото село Калишта, пронајдоа две „висечки мрежи“ со должина од околу 400 метри, кои се најстрого забранети за лов на риба, со улов од 157 парчиња риба белвица, со вкупна тежина од 22 килограми.
Мрежите и уловот се подигнати од водите на езерото и донесени во полициската станица за понатамошна постапка.
Црна хроника
Поднесено обвинение за мотоциклистот што усмрти пешак на кејот и избега

Обвинителството поднесе обвинение против мотоциклистот кој на 1 јули усмрти пешак на кејот на Вардар, на пешачка зона, и избега.
Тој ќе одговара за тешки дела против безбедноста на луѓето и имотот во сообраќајот и занеукажување помош на лице повредено во сообраќајна незгода.
На 1 јули годинава, во вечерните часови, обвинетиот управувал мотор „Кавасаки“ по пешачка патека на улицата „Јордан Хаџи Константинов – Џинот“, наменета исклучиво за движење на пешаци.
Моторот го управувал без воопшто да поседува возачка дозвола и спротивно на сообраќајните прописи, без да ја прилагоди брзината на движење. Имено, иако брзината на движење на моторот била 35 километри на час, што е помала од максимално дозволената на пат во населено место, сепак на наведената локација таа била поголема од безбедна брзина, имајќи предвид дека станува збор за пешачка патека на која моторот можел единствено да го турка, а не и да го вози.
Затоа не успеал навреме да запре и удрил во телото на пешакот Југослав Николовски, роден 1957 година. При ударот, пешакот и сопатникот на моторот се здобиле со телесни повреди, а обвинетиот го оставил моторот и без да им укаже помош избегал од местото на несреќата.
Повредениот пешак со тешки телесни повреди бил пренесен на Ургентниот центар во Скопје каде починал, додека сопатникот на моторот се здобил со телесни повреди.
Јавниот обвинител, со поднесеното обвинение, до Судот достави и предлог за продолжување на претходно определената мерка притвор за обвинетиот.