Традиционална полска вечер на „Охридско лето“

Традиционалната Полска вечер на фестивалот „Охридско лето“ годинава беше во знакот на познатиот Варшавски хармоникашки квинтет кој синоќа одржа концерт во црквата „Света Софија“ .

Овој музучки состав го сочинуваат виолинистките Марија Маховска-Залах и Јустина Баран, Марек Чех на виола, виолончелистката Александра Охар- Справка, како и Клаудиуш Баран на хармоника и бандонеон. За публиката на „Охридско лето“, тие донесоа композиции од Дворак, Швидер и Пјацола.

„Прекрасно е чувството да се биде овде, на ова место кое е посебно убаво, исто како и просторот каде што настапивме. Ја читав историјата на црквата „Света Софија“ пред да дојдеме и многу ме воодушеви. Многу сме задоволни од концертот. Акустиката во црквата е одлична, а публиката внимателно не следеше“, изјави уметникот Марек Чех.

Варшавскиот хармоникашни квинтет првпат настапува пред публиката на фестивалот „Охридско лето“, но и во Македонија.

„Јас претходно сум слушнал за фестивалот. Сум гледал и слики од градот, но искрено, градот е поубав во живо, додаде Чех, кој по настапот на „Охридско лето“, исто како и неговите колеги од квинтетот заминува на одмор.

Почесниот конзул на Полска, бизнисменот Коста Костовски, истакна дека од година во година, на фестивалот „Охридско лето“ доаѓаат сè подобри и подобри уметници од Полска. На концерот присуствуваше и амбасадорот на Полска, Јацек Мултановски.