Турција ѝ упати протестна нота на Германија поради уметничка инсталација поставена во Берлин

Турција ѝ испрати протестна нота на Германија затоа што му дозволи на уметник, во центарот на Берлин да постави спорна уметничка инсталација.

Станува збор за автомобил поставен како награда за убиства на светски лидери, меѓу кои  е и турскиот претседател, Реџеп Таип Ердоган.

Уметничката инсталација е поставена вчера пред зградата во која се наоѓа кабинетот на германската канцеларка Ангела Меркел, а ја сочинува „мерцедес С класа“ и транспаренти со фотографии од Ердоган, од рускиот претседател Владимир Путин и од саудискиот крал Салман.

Еден од слоганите гласи: „Го сакате овој автомобил? Убијте ги диктаторите!“.

Сите тројца лидери чии фотографии се најдоа на спорната инсталација треба да учествуваат на самитот Г20 што ќе се одржува во Хамбург, в петок и сабота. Но кралот Салман во меѓувреме го откажа присуството.

Инсталацијата ја постави Центарот за политичка убавина (Center for Political Beauty)  на чело со Филип Рух.

Турската амбасада во Берлин соопшти дека е „неприфатливо и несфатливо“ на Рух да му се дозволи да постави таква инсталација, без да интервенираат безбедносните сили.

Турската амбасада соопшти дека упатила „итна нота“ до германското Министерство за надворешни работи во знак на протест.