Daily news
Вардар повторно казнет од УЕФА, овојпат со 22.000 евра
Фудбалскиот клуб Вардар на својата официјална веб страница објави дека клубот доби нова казна од УЕФА, овој пат за натпреварот со Копенхаген. После оние 55.000 евра за мечот со Малме, сега Вардарци добија глоба од 22.000 евра. Клубот излезе со соопштение во кое се вели :
„Во канцеларијата на ФК Вардар стигна одлука од УЕФА по која Вардар е казнет со парична казна од 22.000 евра, поради непочитување на правилникот на првиот натпревар од третото квалификациско коло од ЛШ против Копенхаген, одигран на „Телеком Арената“ во Скопје.
ФК Вардар е казнет по следните точки според правилникот на УЕФА:
1. Седење на скали и попречување на движење на публика;
2. Употреба на пиротехнички средства;
3. Вадење на националистички знамиња на јужната трибина во блок број 4 (фронт и неонацистички крст).
Фудбалскиот клуб Вардар и претходно е казнет од страна на УЕФА за натпреварот од второто квалификациско коло против Малме одигран во Струмица со 55.000 евра, поради:
1. Фрлање на предмети на теренот од трибините;
2. Инцидент меѓу гледачите;
3. Блокирање на скали и попречување на движење на публика;
4. Недолично навивање, скандирање против УЕФА;
5. Користење на пиротехнички средства.
Тоа значи дека вкупната казна на ФК Вардар до сега за европските натпревари изнесува цели 77.000 евра.
Очигледно дека апелите од Фудбалскиот клуб Вардар за натпреварот во Копенхаген не дадоа плод, и нашиот клуб повторно заработи казна од УЕФА. Овие казни само му наштетуваат на клубот, на неговото реноме, и носат опасност во иднина европската куќа на фудбалот да превземе и подрастични мерки (празнење на целиот стадион, поголема парична казна) со што клубот би претрпел огромни загуби.
Пред натпреварот со Копенхаген секојдневно апелиравме да нема скандирања против УЕФА, да има фер и коректно навивање без националистички пароли, меѓутоа сето тоа не наиде на почит и разбирање од страна на дел од навивачите присутни на блокот број 4, и повторно настанаа проблеми кои резултираа со санкции.
Зарем треба да дозволиме УЕФА да превземе уште подрастични мерки против нашиот клуб? Зарем треба да дозволиме да ги играме пред празни трибини европските натпревари кои што со нетрпение и во текот на целата година ги чекаме? Затоа уште еднаш апелираме, и ќе апелираме на коректно навивање на следниот натпревар со Фенербахче, во спротивно и понатаму ќе добиваме санкции кои му носат огромни загуби на клубот и на оние кои што сакаат вистински да уживаат во натпреварите и во европските настапи на ФК Вардар.
Едноставно правилата на УЕФА се строги и истите мора да се разберат и да се почитуваат. Овие европски натпревари се разликуваат по многу од домашните мечеви, и бараат многу внимание. Згора на тоа неколку пати напоменавме дека на дуелот со Копенхаген ќе бидат сите високи функционери на УЕФА кои што се подготвуваат за мечот од Супер-Купот кој ќе се игра во Скопје на 8 август.
Затоа уште еднаш апелираме да се прекине со недолично навивање, со скандирања против УЕФА и со националистички скандирања. Да се прекине со фрлањето на предмети и користењето пиротехнички средства. Да не дозволиме да продолжи казнувањето на Вардар, и да покажеме респект кон сите актери на теренот, кон УЕФА. Овие натпревари треба да бидат празник на фудбалот, и место за уживање, а не место за инциденти, национализам, расизам и место каде што ќе се употребуваат разни пиротехнички средства.
Се надеваме на разбирање и на сфаќање на сериозноста која ги носи овие натпревари, а за кои и секоја најмала грешка скапо се плаќа пред УЕФА. Ние сите сме Вардар. На Вардар му треба поддршка, меѓутоа целта ќе ја исполниме само со навивање и однесување согласно со правилата и прописите. Вардар заеднички го градиме, и само заеднички можеме да ги отстраниме грешките и тие појави на поединци кои што не носат корист, но само штета на нашиот и Ваш омилен клуб.“, се вели во соопштението на ФК Вардар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.