Daily news
(ВИДЕО) Заев во Штип: Од септември ќе стартува покачувањето на минималната плата на 12.000 денари
Премиерот Зоран Заев, придружуван од министерката за труд и социјална политика Мила Царовска и пратеникот Благој Бочварски, денеска во Штип се сретнаа со работниците и сопствениците на неколку фабрики за текстил, како и со претставниците на синдикалните здруженија и граѓанските здруженија за заштита на работничките права. На средбите се разговараше за економските мерки на Владата предвидени во ребалансот на буџетот, кои ќе обезбедат зголемување на минималната плата на 12.000 денари, за поддршката за домашните претпријатија и за подобрување на животниот стандард на граѓаните.
На средбата е констатирана заедничка согласност дека остварувањето на предвидените мерки ќе се реализира во интензивна соработка, разбирање и солидарноста помеѓу стопанствениците, работниците и државата.
Премиерот Заев, во разговор со работниците ја изразил одлучноста на Владата да работи на заштита и унапредување на работничките права и на унапредување на животниот стандард на работниците, како и на овозможување на стабилна деловна клима која ќе гарантира развој на домашните претпријатија.
Во изјавата за медиумите по остварените средби, премиерот Заев истакна дека оваа посета на работниците и стопанствениците од Штип, се реализира како дел од подготовките за покачувањето на минималната плата на 12.000 денари во септември.
„Граѓаните знаат дека тенденцијата е да ја покачиме минималната плата на 12.000 денари. Ние сме сериозни во одлуката и сакаме оваа мерка да ја стартуваме на еден прагматичен начин, во консултација со нашите граѓани, пред сè со работниците и со газдите. Нашата намера е мерката за определување на новата висина на минималната плата да биде воведена на 1 септември“, истакна премиерот Заев во изјавата за медиумите.
Тој соопшти дека на овие разговори, од страна на работниците, му била презентирана детална слика за условите што ги имаат на работните места, за платите и за користењето на годишните одмори. На средбата со сопствениците , премиерот Заев укажал на тоа дека решенијата предвидени за подигање на стандардот на работниците ќе бидат во согласност со заложбите за развој и перспектива на компаниите.
Покрај зголемувањето на минималната плата на 12.000 денари, премиерот Заев најави и пакет мерки кои што ќе значат изедначување на условите за работа на домашните со странските инвеститори и информираше дека од почетокот на септември владата ќе објави менија за нови гринфилд инвестиции од кои се очекува отворање на нови работни места.
„Гледаме дека има услови за воведување на една ваква мерка. Ќе продолжат консултациите до донесувањето на законското решение. Она што е важно при воведувањето на една ваква мерка е дека покачувањето на минималната плата на 12.000 денари ја отвора спиралата за покачување на севкупните плати во Република Македонија. Секако прв таргет се текстилната и кожарската индустрија, како најслабо платени, со цел владата на еден внимателен начин, преку буџетски пари, со 1.5 милиони евра месечно, да го следи стопанството за да не дозволиме никакви дисторзии во нивното работење“, истакна Заев.
Тој ги информираше вработените во фабриките што ги посети за новата мерка наВвладата која ќе биде остварена благодарение на ребалансот на буџетот и на домаќинското работење. Со скратувањето на ставките кои се однесуваа на трошоци за рекламирање и репрезентации во странство, ќе бидат ослободени финансиски средства за поддрша на проектот на владата за субвенционирање годишните одмори на најниско платените работници.
„Оваа мерка ќе опфати околу 35.000 работници и дополнително ќе се овозможи продолжување на сезоните во туристичките капацитети ширум Македонија. Верувам дека на тој начин ќе го помогнеме и туристичкиот бизнис“, вели Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.