Daily news
Висока делегација од Конгресот на САД го посети баталјонот на Воената полиција
Министрите за одбрана и надворешни работи, Зоран Јолевски и Никола Поповски денес во Касарната „Илинден“ – Скопје, присуствува за време на посетата на висока делегација од Конгресот на САД на баталјонот на Воена полиција.
Делегацијата составена од конгресмени предводени од конгресменот Боб Гудлат кој е Претседател на комитетот за правосудство имаа можност да се запознаат со активностите на баталјонот на Воена полиција и нивното досегашно учество во мировните мисии.
Министерот Јолевски во своето обраќање до конгресмените и останатите членови на делегацијата најнапред упати благодарност за досегашната поддршка и помош на САД во однос на опремување, учество на обуки и вежби со цел унапредување на одбранбените капацитети на Армијата на Република Македонија и истакна дека досегашната висока соработка со САД ќе продолжи и понатаму.
„Оваа соработка која се должи на Договорот за стратегиско партнерство и соработка од 2008 година и Меморандум за соработка во одбранбените и воени односи од 1994 година, како и соработката со останатите земји на НАТО овозможи ние денес да имаме припадници на Армијата кои стојат рамо до рамо со останатите Армии и кои се подготвени да придонесат кон глобалниот мир и безбедност“ – додаде Јолевски.
„Република Македонија има јасно зацртана цел, а тоа е членство во Европската Унија и НАТО“ – рече Министерот Поповски. Тој додаде дека членството е од клучно значење, од причина што тоа ќе придонесе до развој на Македонија и останатите земји од регионот и воедно ќе се придонесе до одржување на мирот, стабилноста и безбедноста на македонските граѓани, а со тоа и стабилен Регион и стабилна Европа.
Конгресменот Гудлат изрази задоволство од прикажаното и истакна дека ги ценат напорите на Република Македонија во промоцијата на мирот и стабилноста преку учеството во мировните мисии во Ирак и Авганистан. Македонските војници стекнаа висока репутација помеѓу партнерите и сојузниците учествувајќи во мировните мисии.
Тој додаде дека баталјонот на Воената полиција и останатите единици на Армијата на Република Македонија покажале високо ниво на професионализам чувајќи ги границите на Македонија и безбедноста на граѓаните при справувањето со миграциската криза.
„Мило ми е што нашите програми за обука и опремување постигнале одлични резултати во подобрување на капацитетите на баталјонот. Ние ќе останеме посветени во натамошната поддршка и соработка со вас“ – рече Гудлат.
За потребите на Министерство за одбрана и Армијата на Република Македонија од 1996 до денес преку FMF фондот (Фонд на САД за странска воена помош) се доделени преку 115 милиони долари за набавка на опрема и услуги, како што се оклопни возила и резервни делови за истите, оптички средства за ноќно гледање, најсовремени средства за врски, оружје, беспилотни летала, и друга опрема и др. Во наредниот период средствата од овој фонд ќе продолжат да се користат во насока на поддршка на АРМ и нејзина модернизација.
Делегацијата од Конгресот на САД од 06-15 мај е во посета на Грција, Босна и Херцеговина, Албанија, Македонија, Косово и Италија. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.