Daily news
ВМРО-ДПМНЕ: СДСМ расипнички потроши 3 месеци, а ништо не направи за образованието
„СДС како и во сите области така и во образованието расипнички потроши 3 месеци, а ништо не направи. Расипничката влада на СДС потроши стотици милиони евра од аукциите на државните хартии од вредност и од девизните резерви, а не направи ниту еден проект во образованието. Освен укинување и стопирање на крупни образовни проекти и реформски процеси, како и намалување на буџетските средства наменети за подигнување на квалитетот на образованието, во изминатите 3 месеци не видовме ниту една мерка која СДС ја спроведе во интерес на засегнатите чинители во оваа широка општествена сфера“, се вели во реакцијата на ВМРО-ДПМНЕ на прес-конференцијата на министерката за образование Рената Дескоска.
Според партијата, поради некадарноста на министерката за образование и наука од редовите на СДС, институцијата која ја раководи потфрли во извршувањето и на најрутинските активности за успешен старт на новата учебна година. „Во понеделник наставата треба да започне, а во училиштата се уште не е дистрибуиран ниту еден учебник. Рената Дескоска ја лаже јавноста дека тоа ќе биде завршено за 10 дена, занемарувајќи го фактот дека се работи за 500-тини училишни објекти и за преку 270.000 ученици. Изминаа 3 месеци во кои СДС не успеа да закова ниту една шајка во постојните училишта, а не пак, да изради барем една нова училница. Само празни најави и ветувања. Училишните објекти каде во текот на летото беа извршени реконструктивнии санациони активности, а кои Дескоска бесрамно денес ги споменува и присвојува, се всушност инвестиции и активности кои ги започна и речиси заокружи Владата предводена од ВМРО–ДПМНЕ во чие време, потсетуваме се изградени 74 нови училишта, преку 400 се реконструирани, а изградени се и повеќе од 100 училишни спортски сали“, се вели во соопштението.
Понатаму се наведува дека „ Рената Дескоска го сокрила фактот дека ги стопирала активностите за 15-тина други училишта кои беа дефинирани и требаше да бидат реконструирани ова лето, како ОУ “Никола Карев“ во Пробиштип, ОУ “Тошо Арсов“ во Штип, ОУ “Васил Главинов“ во Чаир, “Перпарими“во Чегране…“
„Трагично е што учениците кои годинава за прв пат ќе седнат во средношколските клупи, наместо по најсовремени наставни програми и учебници изготвени од реномираниот светски провајдер – Меѓународниотцентар за наставни програми и учебници, ќе учат по материја која не ги интегрира најновите научни достигнувања и информации, а наставниците пак, ќе се вратат неколку чекори назад и ќе наставата ќе ја реализираат преку застарени методи и техники, затоа што СДС ја укина можноста да ја изразат личната креативност и иновативност во предавањата. Особено загрижува и фактот што СДС започна со брутална партизација и на оваа суштинска општествена област. Па така, и покрај забраните од Државната комисија заспречување на корупцијата за отворање на нови работни места, информациите говоратдека СДС “на големо“ почна да вработува несоодветен, партиски кадар кој треба да ги едуцира најмладите, а дополнително, во време на изборен период, скандалозно најавува и вработување на 70 персонални асистенти за ученици со посебни потреби“, се наведува во реакцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.