Daily news
Грипот зеде замав – 1.085 новозаболени минатата недела
Грипот зеде замав во земјата. Според податоците на Институтот за јавно здравје, минатата недела се пријавени 1.085 новозаболени лица од грип и на грип слични заболувања, што е зголемување од 70 отсто во споредба со минатата недела кога беа регистрирани 637 заболени лица.
Во однос на минатата сезона кога биле регистрирани 1.919 случаи, постои намалување од 9 отсто на бројот на заболени.
Минатата недела најголем број заболени – 699, се пријавени во најголемата возрасна група од 15 до 64 години, а највисока инциденца од 71,7/100.000 жители се регистрира кај децата на возраст од 5 до 14 години.
Оваа недела најголем број заболени лица (n=292) и највисока инциденца (243,8/100.000 жители) се пријавени од подрачјето на Гостивар.
Досега во сезоната 2017/2018 вкупниот број на пријавени случаи со заболувања слични на грип изнесува 3.478 (I=168,1/100.000). Регистрираниот број случаи е повеќекратно помал во споредба со истиот период од минатата сезона (32.934).
Досега најголем број заболени лица – 887, се регистрирани во Гостивар и 413 во ЦЈЗ „Тетово“, а највисока инциденцата од 1.091,7 на 100.000 жители е регистрирана на подрачјето на Дебар. Во однос на дистрибуцијата на заболените по возрасни групи, кумулативно најголем број заболени се пријавени во возрасната група од 15 до 64 години – 2.307 случаи (66 отсто), а највисока кумулативна инциденца од 207,4/100.000 се регистрира кај децата на возраст од 5 до 14 години.
ВИРУСОЛОШКИ НАДЗОР
Минатата недела во вирусолошката лабораторија на ИЈЗ тестирани се 21 материјал за грип. Од тестираните материјали, 8 се позитивни за присуство на вирусот на инфлуенца – 5 Influenza B (Yamagata) и 3 Influenza A(H1N1)pdm.
Од почетокот на сезоната 2017/2018 во ИЈЗ пристигнати се 132 хумани материјала од здравствените установи, од кои 21 (15,9 отсто) се позитивни за присуство на вирусот на инфлуенца, од кои 9 се Influenza A (8 суптипизирани како А(H1N1)pdm и еден А-несуптипизиран), а 12 се Influenza B (Yamagata).
ВАКЦИНАЦИЈА ПРОТИВ ГРИПОТ
Во епидемиолошките служби на ЦЈЗ/ПЕ вакцинацијата започна на 17 октомври, а на располагање за вакцинација во јавните здравствени установи за оваа сезона беа 27.997 дози.
Искористени се сите набавени вакцини – вакцинацијата против сезонски грип е завршена на територијата на РМ. Најголем број од вакцинираните се на возраст над 65 години – 60,5 отсто. Од вкупниот број вакцинирани, 75,2 отсто се со историја на хронично/и заболување/а.
ЕВРОПСКИ РЕГИОН
Во согласност со извештајот на Flu News Europe за состојбата со грипот во сезоната 2017/2018, во Европа се регистрира широка распространетост на активноста на вирусот на грипот во најголем дел од земјите од регионот, а се зголемува во земјите од источниот дел од континетот. Низок интензитет на активност се регистрира во 21 земја, среден во 16, а во 5 (Италија, Ирска, Луксембург, Малта и Шпанија) се регистрира висок интензитет на активност на вирусот на грипот. Во однос на географската распространетост, во 7 земји се регистрира спорадична, во 4 локална, во 7 регионална и во 22 широка распространетост.
Врз основа на податоците доставени до EuroMOMO, во текот на изминатите недели се зголеми смртноста кај старите лица, особено во земјите од јужниот дел од Европа и Велика Британија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.