Daily news
Девојче од Британија починало зашто докторката одбила да го прими бидејќи доцнеле на прегледот
Петгодишно девојче од Велика Британија, кое боледувало од астма, починало кога докторката одбила да го прими затоа што задоцнило на прегледот, објави Би-би-си.
Истрагата во врска со овој случај открила дека докторката Џоан Роу од клиниката „Гранџ“ во Њупорт одбила да ја прегледа петгодишната Ели Меј Кларк поради правилото на 10 минути, според кое докторката одбивала да ги прими пациентите што ќе задоцнат толку или повеќе од тоа.
Истражниот судија изјави дека со тоа била пропуштена можност за лекување која можела да му го спаси животот на девојчето. По сослушувањето во Њупорт, семејството на девојчето изјавило дека болницата ја изневерила нивната доверба. Мајката Шенис Кларк рекла дека побарала домашна посета кога Ели Меј почнала да дише тешко и не можела да оди од училиште кон дома во јануари 2015 година. Наместо домашна посета, клиниката закажала итен преглед 25 минути подоцна. Во телефонскиот разговор со претставник од клиниката мајката нагласила дека е можно да доцнат бидејќи доаѓаат со автобус.
Мајката на рочиштето изјавила дека наместо во 17 часот, во клиниката пристигнале во 17.10 часот, но рецепционерката Ен Џонс им рекла дека задоцниле 18 минути. Тогаш и доктораката Џоан Роу им рекла дека ќе мора да се вратат следното утро. Шенис Кларк изјавила дека била многу лута и вознемирена во врска со одлуката на докторката, а Ели Меј ја запрашала: „Зошто докторката не сака да ме прегледа?“ Роу исто така не прашала зошто е закажан итен преглед ниту, пак, го видела здравствениот картон на девојчето пред да одбие да ја прими.
Дома, на секои 10 до 15 минути. мајката ја проверувала состојбата на болната ќерка, а околу 22.30 ја слушнала дека силно кашла. Ели Меј потоа паднала од креветот и кожата ѝ добила сина боја. Девојчето било итно пренесено во болницата „Ројал Гвент“, но таму починало.
Семејството објави изјава во која се вели дека биле разочарани бидејќи докторката не била обвинета за небрежност. Докторката, пак, изјавила дека ќе постапела поинаку доколку го видела здравствениот картон на Ели Меј. Кога била запрашана за правилото од 10 минути, таа одговорила: „Ако мора да прегледате 25 пациенти наутро или попладне, а многумина од нив доцнат 15 или 20 минути, никогаш нема да можете да ја завршите работата“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.