Daily news
ЕКРИ бара Србија да го признае геноцидот во Сребреница
Европската комисија против расизам и нетолеранција ја повика Србија да го признар геноцидот во Сребреница за да спречи повторна појава на меѓуетнички говор на омраза и насилство.
„Политичките лидери во Србија би требало официјално да признаат дека масакрот извршен во Сребреница во јули 1995 година претставува геноцид“, стои во препораката на ЕКРИ.
Во извешајот објавен денес стои дека српските власти би требало да спроведат појасна и построга политика во врска со процесуирањето на воените злосторства на расна основа и во судството да ги обезбедат потребните човечки и други ресурси за унапредување и ефикасно извршување на постапките при кривичното гонење и изрекувањето казни на воените злосторници.
Со констатација дека Србија се извини за злосторствата во Сребреница (Декларација за осуда на злосторствата во Сребреница што се повикува на пресудите на Меѓународниот суд на правдата, а е усвоена во Собранието на Србија во 2010 година) и извинувањето на претседателот на Србија (2013 година), ЕКРИ „жали поради фактот што ниту еднаш во двете извинувања не е јасно признаено дека тие масакри претставуваат геноцид, како што тоа го утврдиле меѓународните судови”.
Во извештајот исто така се вели и дека ЕКРИ длабоко жали поради бавното напредување во процесирањето и казнувањето на геноцидот и на другите расистички воени злосторства извршени за време на неодамнешните војни.
ЕКРИ препорачува дека е потребно во Србија да се искоренат расизмот и говорот на омраза меѓу фудбалерските навивачи, а дека истовремено е потребно да се сврти вниманието и во насока на насилството против ромската и ЛГБТ популацијата.
Во тој контекст, ЕКРИ препорачува Собранието и Владата на Србија да усвојат кодекс на однесување којшто ќе забранува употреба на говор на омраза, ќе предвидува суспензија на мандати и други санкции при кршење на овие одредби и воспоставување на функционални канали за нивно извршување.
Европската комисија против расизам и нетолеранција исто така им препорачува на властите во Белград да му дадат приоритет на вработувањето сразмерен број на Роми и членови на останатите малцинства во државната служба и да им се обезбедат еднакви стабилни услови за работа како и на останатите државни службеници.
Европската комисија против расизам и нетолеранција, која е основана од страна на Советот на Европа, претставува независно тело за следење на состојбата на човековите права, специјализирано за проблемите поврзани со расизам и нетолеранција. Крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.