Daily news
Почна обуката за градење интегритет за највисокото раководство на МО и АРМ
„Градењето интегритет е политика која нема алтернатива, политика која ќе нè направи помоќни како држава. Интегритетот создава доверба и силни системи, кои и во моменти на криза даваат резултати. Треба да создадеме систем на принципи кој нема да зависи од тоа кој е министер, и ќе биде имун на секој обид на злоупотреба на службената должност“, рече министерката за одбрана, Радмила Шекеринска, на денешното отворање на обуката за градење интегритет за највисокото раководство на МО и АРМ.
Обуката за градење интегритет е организирана од Министерството за одбрана, во соработка со Обединетото Кралство, а предавачи се експерти за градење интегритет од Академијата за одбрана на Обединетото Кралство. На обуката учествува раководството на Министерството за одбрана и на АРМ.
Министерката Шекеринска рече дека прашањето на транспарентноста е поврзано со прашањето на интегритетот и дека борбата против корупцијата бара систем којшто ќе создава пречки за каква било злоупотреба на службената должност.
„Задоволна сум што успеавме за релативно кусо време да го создадеме и оној дел од веб-страницата на Министерството којшто се вика ‘Јавноста има право да знае’, зашто навистина е така – јавноста има право да знае што правиме со стратешките цели во државата, јавноста има право да знае што правиме со парите коишто граѓаните ги одделуваат и ги плаќаат во буџетот на Македонија. Транспарентноста не е секогаш лесна, секогаш доаѓа со одредена цена, но на долг рок секогаш позитивно се враќа“, истакна Шекеринска.
Министерката заклучи дека иако транспарентноста не секогаш ќе биде дочекана со аплауз и дека ќе изгледа дека таа го направила денот посложен, мора да се знае дека нашата задача не е спринт на сто метри туку маратон, а во тој маратон транспарентноста е подобрата политика.
Заменик-амбасадорот на Обединетото Кралство во земјава, Пол Едвардс, истакна дека процесот на градење интегритет бара култура на работење во која секому ќе му биде јасно дека секоја одлука која се носи на дневна база треба да биде за доброто на сите граѓани, а не на малкумина од раководството. Додаде дека интегритетот бара чесност и соочување со корупцијата, а зборувањето на вистината пред претпоставените е еден од елементите на градењето култура на интегритет. Едвардс се заблагодари за можноста за одржување на овој важен курс за раководството во Министерството и истакна дека Обединетото Кралство ќе продолжи да ја поддржува Македонија во реализацијата на овие клучни реформи во областа на одбраната.
Обуката за градење интегритет трае до петок, а ќе бидат опфатени предавања и вежби на повеќе теми, како однесување на службениците, лидерски предизвици и воено-политички ризици, менаџмент со финансии, ризици од корупција во делот на логистиката и набавките, ризици од корупција во менаџирањето на човечките ресурси, медиуми и стратегиска комуникација, предизвици од промените и слично.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.