Daily news
(ВИДЕО) Михајлоски повика на конгрес за избор на нов лидер за демократска ВМРО
„Идеалот на ВМРО е за слобода и правда, токму ваквите идеали беа напуштени изминатите години. Беше задушена слободата и беа направени големи неправди. Токму затоа на овие локални избори граѓаните членовите и симпатизерите на ВМРО-ДПМНЕ го казнија тој начин на владеење. Политичарите треба да извлечат поука дека во иднина секој што ќе се обиде да го узурпира најсветото нешто, а тоа се слободата на човекот и правото на просперитетен живот, ќе биде жестоко казнет и отфрлен“, порача на вечерашната прослава во Младинскиот културен центар во Скопје реформаторот Александар Михајлоски, кој е иницијатор на демократската и европска иднина на ВМРО.
Според него, токму затоа граѓаните на овие локални избори го казнија самоволието, а политичарите треба да извлечат поуки. „ВМРО-ДПМНЕ со изградба на белиот дворец го напушти идентитетот од народна партија и стана елитистичка партија, што беше причина за големо разочарување кај членството. Затоа, најавуваме дека ќе го напуштиме тој елитистички концепт и ние, по реформите, ќе ја напуштиме таа зграда и повеќе нема да биде наше седиште“, рече Михајлоски.
Во салата во кое одекнуваше „оставка, оставка“ за сегашниот лидер Никола Груевски, Михајлоски рече дека овие пораки и поуки важат и за СДСМ.
„Некои пораки и потези веќе се гледа дека се продолжуваат како пракса, но не треба да ги понесе триумфализам или народот ќе ги казни на следните избори“, порача Михајлоски.
Тој рече дека ВМРО мора јасно да се дистанцира од криминалот и крупцијата. „Партијата нема да штити криминал и корупција. Ќе промовираме нови политики што ќе го заменат сегашниот нефункционален систем со нова подобра верзија. Да направиме помирување во општеството, да отвориме дијалог меѓу сите политички партии – со ова ќе дадеме силен импулс кон интеграцијата во европското семејство. Предуслов за ова е одржување демократски и слободен конгрес, на кој членовите ќе го изберат својот лидер. Ние имаме план и ве уверувам дека реформите ќе победат. Дојдено е време за промени. Промените се во интерес на сите во Македонија. На Македонија ѝ треба реформирана ВМРО-ДПМНЕ. Да се обединиме сите и да организираме слободен конгрес, на кој членовите ќе изберат нов лидер, да ја вратиме довербата и на следните избори да извојуваме голема победа“, порача Михајлоски.
К. Озимец
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.