Daily news
Мицкоски: Политичка хајка и притисоци врз градоначалниците на ВМРО-ДПМНЕ
„Социјалдемократскиот сојуз продолжува со политичката хајка и притисоците врз кандидатите за градоначалници што е израз на нивниот страв и нервоза од претстојниот изборен пораз. Она што Социјалдемократскиот сојуз го прави не е само киднапирање на институциите, не е само диктатура и режим, во Македонија завладува хунта. Во истиот момент кога министерот за внатрешни работи, господинот Спасовски дава изјава дека полицијата нема се вклучува и интервенира во изборите, имаме поднесување на монтирана и целосно бесмислена кривична пријава против градоначалник на ВМРО-ДПМНЕ, а финансиската полиција има упад во уште една општина раководена градоначалник на ВМРО-ДПМНЕ“, изјави Христијан Мицкоски, Генерален секретар на ВМРО-ДПМНЕ.
Денеска беше поднесена кривична пријава против градоначалникот на Крива Паланка, Арсенчо Алексовски затоа што обезбедил бесплатен превоз за учениците. „Исто така денес финансиската полиција раководена од политичките структури на Социјалдемократскиот сојуз упадна во исто време во општината Вевчани, и во семејната фирма на градоначалникот на Вевчани, господинот Цветомир Угриновски. И ова не беа единствените случаи на политичка конструкција врз градоначалници на ВМРО-ДПМНЕ. Претходно, бесмислена кривична пријава беше поднесена врз градоначалникот на Прилеп, господинот Марјан Ристески, зошто не ја осигурал општината од нагрдувањето на шарената револуција додека тие што ја нагрдуваа и оштетуваа се на слобода. Градоначалникот на Велес, господинот Славчо Чадиев доби кривична пријава за тоа што ставил точка на дневен ред на советот на општината пред точно 5 години. Градоначалникот на Кавадарци, господинот Панов доби кривична пријава заснована на исказ кој два пати го променил истиот, без никаков конкретен материјален доказ, а на удар се најде и кандидатот за градоначалник на истата општина, господинот Митко Јанчев кој без било каква причина беше застанат и малтретиран од страна на претставници на МВР, а досега никој за жал не е санкциониран поради тој настан“, рече Мицкоски.
Според него, Социјалдемократскиот сојуз преку инструираните институции поднесе кривична пријава и против градоначалникот на Штип, господинот Илчо Захариев поради тоа што направил пристапен пат до фабрика која е странска инвестиција и која што вработува стотици штипјани. Политичка монтирана пријава доби и градоначалникот на Неготино, господинот Ванчо Апостолов.
„Сето ова се случува во рок од само еден месец што е јасен показател дека на овие избори Социјалдемократскиот сојуз има недостаток на проекти, идеи, предлози, и дека нивна главна понуда ќе бидат политичките хајки и притисоци против кандидатите за градоначалници предложени од страна на ВМРО-ДПМНЕ. Тие нема да сакаат да говорат за она што им е важно на граѓаните, за решенија, програми, патишта, паркови, проекти, нивниот фокус ќе биде политичката хајка против ВМРО-ДПМНЕ. Пријавите се јасен израз на нервозата во Социјалдемократскиот сојуз и страв од претстојниот пораз на локалните избори. Нема да не уплашат, и нема да им помине. Секој ден луѓето се помотивирани, и поспремни да се спротивстават на ваквата хајка. Народот е веќе одлучен, а Социјалдемократскиот сојуз треба да се соочи со сопствената неспособност, со слабата поддршка и поразот кој им престои на следните локални избори. Колку повеќе прават притисоци, толку повеќе ќе ја губат поддршката од народот. Сите релевантни меѓународни дипломатски претставништва во земјата ќе бидат известени за злоупотребите кои ги прави актуелната власт предводена од Социјалдемократскиот сојуз. И на крај ќе биде посочена дека многу брзо ќе дојде времето кога ќе одговараат поради сите овие неправди и злодела кои што се случуваат во изминатите неколку дена. Правдата ќе ги стигне за сите и правдата е над сите“, рече Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.