Daily news
На охриѓани им попуштија нервите: Тлото не мирува, надлежните смируваат дека нема место за паника
Ноќеска во Охрид беше релативно мирно, по земјотресот со јачина од 3,7 степени со епицентар во селото Косел, во 21.31 часот. Но со искуството од претходната непреспана ноќ, за охриѓани нема мирен сон.
Речиси еден месец тлото се тресе. Веќе не се знае што е ден, а што ноќ. Охриѓани дремнуваат преку ден по плажите, користејќи лежалки, така што си ги заменија улогите со туристите.
Нова појава се „патувачките куќи” на четири тркала, кои ги има по автокамповите, покрај езерскиот кеј, на сите слободни паркиралишта.
Голем е бројот на оние што навечер, скришум, се измолкнуваат од своите домови, ги земаат возилата и бараат, според нив, побезбеден простор, за колку-толку да дремнат.
Охриѓани, одеднаш, од домаќини станаа гости во автокамповите. Не им е далеку и оној во Свети Наум, во сопственост на АРМ, по одлуката на Министерството за одбрана да го отвори за граѓаните.
– Ако не сите, барем децата да се засолнат – коментира охриѓанка сместена со внуците во автокампот „Васко Карангелевски” во Свети Наум.
Непреспани и заморени, во постојан стрес и неизвесност, особено тешко се поднесуваат ноќните поместувања на тлото. Веќе неколку ноќи по ред, тресе навечер и околу полоќ.
Така беше и ноќта на 7 јули, на четири минути по полноќ кога силно тресење и бучава го здрма Охрид. И како тоа да беше малку, ноќта меѓу петокот и саботата, следуваа уште седум помали последователни потреси. Охриѓани велат агонијата и несоницата повеќе не се издржува, ни седативи ни ништо не им помогаат.
Тлото толку долго не мирува, што веќе е мал смирувачкиот ефект кој доаѓа од дежурните сеизмолози. Тие апелираат граѓаните да останат смирени и да не паничат, а медуимите да не ги вадат од ракав бројките за јачината на земјотресите и да не подгреваат паника и страв кај населението.
Нивниот став е дека не е очекувано да има потрес поголем од 5 степени, како оној кој се случи во понеделникот. Дополнително објектите се издржливи и тестирани на посилна јачина за која охридскиот регион нема потенцијали.
Сепак „стравот лозјето го чува!”. Преспиваат во кампови, шатори, дворови и автомобили. Градот е полуиспразнет, земјотресите ги избркаа и домашните, но и дел од странските гости. Угостителите се исплашени дека ваквата ситуација ќе им ја уништи сезоната.
Дневната, каква таква живост, ја нема навечер освен по кафулињата и ноќните клубови, кои организираат забава за помладите, поради новиот феномен – сите што во градот дошле од селата на некогашната Охридска околија, навечер да се враќаат таму. ”Земјотресите го вратија животот на село!”-се шегуваат мајтапчиите.
Од Охрид заминаа и многу жители со овдешно потекло, сега во други градови во земјата. Се враќаат, предвреме, и оние од западните земји, но и од прекуокеанските дестинации, кои беа дојдени на годишен одмор и видувачка со своите од стариот крај.
Нов феномен, за кој малку се знае и пишува: Сите невести, омажени во Охрид од други градови, веќе се засолнати на побезбедно, во старите домови, што подалеку од Охрид. Ете и тоа го видовме: Привлечниот Охрид, наеднаш стана одбивен! Особено за мајките со помали деца, а кај децата заминуваат и охридските зетови.
Малку им беше стравот, малку им беше стресот, па сега гладните и алчни за брза заработувачка, им го дозагорчија животот на охриѓани со неподносливите ноќни децибели по клубовите. Ечи музика која ги потресува прозорците, а никој од надлежните “не се потресува!” тоа да го санкционира, да го спречи, или барем да го ограничи, на пример-до полноќ, а не “сè додека не им здосади”, а тоа е до 3 часот после полноќ.
Несовесноста отиде дотаму што кај дувлото во Косел се палат гуми, за да се создаде дополнителен страв, а се активираше и подземјето, крајно несовесниот арамилак, да се заработи на заедничката мака. За среќа, таа појава надлежните брзо ја пресекоа.
Во вакви ситуации, потребна е поголема транспарентност и будност не само на сеизмолозите, туку и на политичарите на најодговорни позиции. Охриѓани немаат разбирачка и не ја примија со симпатии посетата на шефот на државата на Барселона и други атрактивни дестинации.
– Тој ќе се нацрта на Петровден (12 јули) да го отвори фестивалот “Охридско лето”, потоа ќе му ја заседне под сенките на државната вила во Горица, а каде беше досега, да дојде и со својот престој тука да внесе охрабрување мегу охриѓани – коментира средовечен маж, не сакајќи да се именува.
Со правo, или не, од вакви забелешки не се поштедени и претставниците на новата власт. Го повикуваат новиот премиер да дојде и мегу нив, “а не само, навечер, на свечено отворање на нов хотел”.
И треба да ги разберат за тоа. Охриѓани живеат под постојан стрес од 18-ти јуни, кога започна да се тресе тлото под Охрид.
– Ова не било. Трае предолго и премногу е тоа, ни создава преголем стрес и мора човек да се тргне на страна малку во вакви ситуации – е најчестиот коментар.
До сега Охрид го потресоа повеќе од 1.200 земјотреси. Најсилниот се случи на 3 јули со магнитуда од 5 степени по Рихтер. Иако земјотрес не може да се предвиди, сеизмолозите сметаат дека не треба да се очекува посилен потрес и дека тлото под Охрид полека ќе се смирува.
Веле Митаноски
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.