Daily news
На првиот упис запишани 11.205 ученици во средно образование
Во првото пријавување од јунскиот рок за упис во средно образование за 2017/2018, кое беше спроведено во изминатите два дена (28-ми и 29 јуни), се пријавиле 17.179, а се запишале 11.205 ученици, соопшти Министерството за образование и наука. Од учениците кои се запишале, 8.590 се за настава на македонски наставен јазик; 2.440 ученици за настава на албански наставен јазик; 99 ученици за настава на турски наставен јазик и 76 се повторувачи.
Според видот на образование, запишани се 4.878 ученици во гимназиско образование , 6.151 во стручно образование и 176 ученици во спортска гимназија.
МОН ги објави јавните средни училишта во Република Македонија во кои според добиените извештаи уписот е завршен во првото пријавување во јунскиот уписен рок.
Уписот е завршен за гимназиско образование во:
СУГС Гимназија „Никола Карев“ – Град Скопје,
СУГС Гимназија „Орце Николов“ – Град Скопје,
СУГС „Георги Димитров“ – Град Скопје;
СУГС „Раде Јовчевски Корчагин“ – Град Скопје;
СУГС Гимназија „Јосип Броз Тито“ – Битола.
Уписот е завршен за здравствена струка во:
– СУГС „Д-р Панче Караѓозов“ – Град Скопје, за образовниот профил медицинска сестра, забен техничар, фармацевтски лабораториски техничар во паралелките на македонски наставен јазик и на албански наставен јазик, како и за образовниот профил физиотерапевтски техничар и медицинско лабораториски техничар во паралелките на македонски наставен јазик;
– СОУ„Наце Буѓони“ – Куманово за образовниот профил медицинска сестра во паралелките на албански наставен јазик;
– СОУ „Ѓорче Петров“ – Прилеп за образовниот профил: медицинска сестра и фармацевтски лабораториски техничар во паралелките на македонски наставен јазик;
– СОСУ „Св.Кирил и Методиј“ – Охрид за образовниот профил медицинска сестра во паралелките на македонски наставен јазик;
– СОУ „Нико Нестор“ – Струга за образовниот профил медицинска сестра во паралелките на македонски наставен јазик;
– СОУ „Димитар Влахов“ – Струмица, за образовниот профил медицинска сестра, фармацевтски лабораториски техничар и физиотерапевтски техничар во паралелките на македонски наставен јазик.
Уписот е завршен за економско-правна и трговска струка во:
– СОУ „Јане Сандански“ – Битола, за образовниот профил економски техничар во паралелките на македонски наставен јазик;
– СОУ „Нико Нестор“ – Струга за образовниот профил економски техничар во паралелките на македонски наставен јазик;
– СОУ „8ми Септември“ – Тетово за образовниот профил правен техничар во паралелките на македонски наставен јазик.
Уписот е завршен за електротехничка струка во:
– СОУ „Гошо Викентиев“ – Кочани, за образовниот профил електротехничар за компјутерска техника и автоматика во паралелките на македонски наставен јазик;
– СОУ „Никола Карев“ – Струмица за образовниот профил електротехничар за компјутерска техника и автоматика во паралелките на македонски наставен јазик.
Уписот е завршен за машинска струка во:
– СОУ „Никола Карев“ – Струмица за образовниот профил автотехничар – мехатроничар и техничар за компјутерско управување во паралелките на македонски наставен јазик.
Второто пријавување во јунскиот уписен рок ќе биде на 5 јули, а резултатите ќе бидат објавени следниот ден, 6 јули. МОН информира дека за второто пријавување слободни места има во јавните средни училишта во сите општини во Република Македонија за вкупно 24529 ученици.
Слободни места за настава на македонски наставен јазик има 16.118, за настава на албански наставен јазик 7.455, за настава на турски наставен јазик има 819, за српски наставен јазик слободни се 34 места и 103 слободни места за повторувачи.
Според видот на образование, во второто пријавување во јунскиот уписен рок слободни места во гимназиите има 6.171 ( 3.504 за ученици на македонски наставен јазик; 2.215 за ученици на албански наставен јазик; 344 за ученици на турски наставен јазик; 34 за ученици на српски наставен јазик и 74 за повторувачи), во стручно образование има 18 252 слободни места (12.554 за ученици на македонски наставен јазик; 5.204 за ученици на албански наставен јазик; 475 за ученици на турски наставен јазик и 19 за повторувачи). Во спортската гимназија слободни се 106 места од кои 60 се за ученици на македонски наставен јазик, 36 за ученици на албански наставен јазик и 10 за повторувачи.
Во вкупниот број запишани ученици и слободни места за второто пријавување во јунскиот уписен рок не е пресметан бројот на учениците од средните училишта за уметничко образование, бидејќи учениците во тие училишта полагаат дополнителни испити.
Во Државното средно училиште Спортска академија во прва година се запишаа вкупно 204 ученици, од кои 116 за фудбал, 58 за ракомет, 25 за кошарка и 5 за тенис.
Министерството за образование и наука соопшти дека поради големиот интерес на учениците за упис во СУГС Гимназија „Орце Николов“- Скопје одлучило во ова училиште да не се спроведе квалификациско тестирање, односно да бидат примени сите ученици кои во текот на основното образование постигнале континуиран одличен успех во сите одделенија и по сите наставни предмети.
Во учебната 2016/2017 година деветто одделение завршиле 20712 ученици. Согласно измените на Законот за средно образование, средното образование од учебната 2008/2009 година е задолжително за сите ученици.
– За таа цел се обезбедени доволен број слободни места, вкупно 35.909 ученички места – и тоа 25.127 на македонски наставен јазик, 9.830 на албански наставен јазик, 918 на турски наставен јазик и 34 на српски наставен јазик (во кои се вклучени и паралелките во реформирано двегодишно и тригодишно стручно образование) во сите јавни средни училишта во Република Македонија, информира МОН.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.