Daily news
(ВИДЕО) Отворен стечајот на „Фени“
Основниот суд во Велес го усвои предлогот на банките кредитори за отварање стечајна постапка за металуршкиот комбинат „Фени“. Стечајот го иницираа Стопанска банка АД Скопје, Комерцијална банка АД Скопје и банката „Силк роуд“ АД Скопје, поради долг од 60 милиони евра, од кои 40 кон банките, а 20 кон други доверители.
Судот ги прифати доказите на претстечајниот управник Мирослав Анастасиевски дека „Фени“ не е способен да ги намирува долговите и дека фабриката има имот доволен за поведување стечајна постапка. За стечаен управник беше назначен претстечајниот управник Анастасиевски. Судот ги повика доверителите во рок од 15 дена од објавата во „Службен весник на Република Македонија“ да ги пријават побарувањата, а ги повика и должниците на „Фени“ да го намират долгот кај стечајниот управник.
Претставниците на „Кунико рисорсис“, во чии рамки функционира „Фени“, како и претставничката на „Енекод“, која во исто време беше претставничка и на „Фени“, во четири наврати се обидоа да го опструираат денешното судење. Четири минути пред почетокот на судењето преставникот на „Кунико рисорсис“ побара да се одложи стечајот оти не биле исполнети условите за тоа. Кога ова барање не беше прифатено, претставничката на „Фени“ побара одложување на рочиштето за три до пет дена оти „Енекод“ доставил нова понуда, а времето им било потребно за да се договорат со банките.
И ова барање беше отфрлено, а нов обид за опструкција имаше кога претстечајниот управник го презентира извештајот во кој наведе дека „Фени“ нема поднесено завршна сметка за 2016 година во Централниот регистар. Претставничката на „Фени“ рече дека завршна сметка е поднесена и дека извештајот не е потполн. За оваа забелешка банките и судијката укажаа дека „Фени“ имал доволно време да реагира бидејќи извешајот бил изготвен на 15 ноември. Четвртата опструкција беше барањето за изземање на судијката поради сомневање за нејзина непристрасност бидејќи ги одбила сите нивни барања во текот на судењето.
По судењето, за стечајот на „Фени“ се изјасни и Синдикатот.
„Ќе ги држиме за збор најавите дека ќе им бидат исплатени платите на вработените и дека ќе се најдат инвеститори“, изјави генералниот секретар на Синдикатот на индустрија, енергетика и рударство (СИЕР), Маре Анчева.
Маја Илиевска-Пачемска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.