Daily news
Проектот „Фудбал за пријателство“ претставен во МОК
Македонските учесници во проектот „Фудбал за пријателство“, младите амбасадори Стефан Талевски, млад фудбалер од подмладокот на ФК „Пелистер“ од Битола и Симона Костадинова, ученик од Скопје и националниот амбасадор на проектот, проф. д-р. Наташа Мешковска, во просториите на Македонскиот олимписки комитет (МОК) остварија средба со д-р Васил Тупурковски, претседател на МОК и Владимир Богоевски, спортски директор на МОК.
На средбата македонските учесници го претставија проектот и неговите цели и разговараа за неговите вредности – пријателство, мир и еднаквост, како и поттикнување на негување на истите помеѓу граѓаните на Македонија. Младите амбасадори на присутните им подарија сино-зелена алка на пријателството – официјален симбол на проектот и неговите клучни вредности.
„Голема чест и задоволство ми претставува можноста да ја продолжам личната спортска кариера како амбасадор на проектот ‘Фудбал за пријателство’. Верувам дека заедно со другите претставници од Македонија, пред сѐ младите Стефан и Симона, ќе ги промовираме вредностите и значењето на овој голем интернационален проект. Истовремено, очекувам дека ќе наидеме на поддршка од целокупната македонска јавност и заедно ќе продолжиме да ги негуваме вредностите на проектот“ – изјави проф. д-р. Наташа Мешковска, амбасадор на проектот „Фудбал за пријателство“ за Македонија.
„Како прв директен учесник од Република Македонија во проектот ‘Фудбал за пријателство’ чувствувам голема одговорност при ширењето на неговите клучни вредности помеѓу моите врсници. Се надевам дека со реализација на еден ваков проект ќе ги мотивираме и поттикнеме сите луѓе да ги шират и секојдневно да ги применуваат вредностите – одлика на проектот“ – изјави Стефан Талевски, млад фудбалер од подмладокот на ФК „Пелистер“ Битола.
„Како претседател на Македонски олимписки комитет и повеќедецениски протагонист на случувањата во спортот, воопшто, со огромно задоволство давам лична поддршка на проектот ‘Фудбал за пријателство’. Од тоа што го разговарав со македонските учесници можам да заклучам дека ваквиот пристап со сигурност ќе придонесе за развој на спортскиот дух и спортската култура. Дополнително, за времињата во кои живееме вакви високоморални процеси се неопходни за одржување и развој на меѓучовечката толеранција. Затоа, ги поттикнувам Стефан и Симона да продолжат и по завршувањето на проектот интензивно да комуницираат со сите стекнати другари и пријатели – затоа што денес е тоа лесно и едноставно. Ја користам оваа можност на македонската делегација да ѝ пожелам пријатно и успешно патување во знакот на спортскиот дух“ – изјави д-р Васил Тупурковски, претседател на МОК. /крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.