Daily news
Седмо издание на ултрапланинскиот маратон „Крали Марко треилс“
Годинава седми пат во Прилеп од 22 до 24 септември ќе се одржи ултрапланинскиот маратон со наслов „Крали Марко треилс“.
Оваа година има рекорден број пријавени натпреварувачи, дури 388 од 22 држави од целиот свет. Мотото на маратонот е „Почувствувај ја легендата, истрчај го митот“.
Годинава ќе се трчаат 4 трки. Најстарата и најмасовна трка „Трескавец треил“ е долга 16 километри и стартува од амфитеатарот во населбата Варош, минува под Марковите Кули и преку живописните околни прилепски ридови оди до манастирот „Трескавец“. Трката ќе започне во 10 часот на 23 септември.
„Камена Баба треил“ започнува и ја следи истата патека до манастирот „Трескавец“, како и „Трескавец треил“, за потоа да продолжи по фасцинантниот карпест терен на патот за селото Дабница. Оттаму оди по ридот Кукул, на кој се наоѓа и светски познатиот болдеринг-локалитет Камена Баба и се упатува кон контролната точка на Прилепското Езеро. Од таа контролна точка патеката се враќа назад, го заобиколува Кукул и болдер-локалитетот Камена Баба и се упатува кон седлото „Наковална“ каде што се префрла на северната страна на ридот зад Марковите Кули. Оттука трката се враќа во Варош. Патеката е долга 31 км, а трката започнува исто така во 10 часот на 23 септември.
Третата патека „Козјак треил“ е трката од која започна сѐ. Првпат беше одржана во 2012 година како прва и најдолга ултрапланинска трка во Македонија и оттогаш наваму имаше 3 изданија. Името на трката потекнува од највисоката точка на патеката, врвот Козјак (1.747 м), кој се наоѓа на точно половина патека, а има вкупно висинско качување од 3.000 м низ теренот што ви гарантира доживување кое ќе го паметите засекогаш. Таа е долга 65 км и ќе започне во 8 часот на 23 септември.
Најдолгата трка го носи и најголемиот предизвик. Станува збор за трка со должина од 110 километри.
Патеката ќе ве води низ низа прекрасни села, манастири и историски места, а недопрените треил-патеки во резерватот Мукос, врвот Козјак и Марковите Кули, како и техничките спустови низ карпест и каменен предел, ја прават трката да биде ултимативен тест на издржливост и една од најтешките на Балканот.
Најкратката, највесела и најшарена трка, „Маркукуле треил“, е наменета за најмладите и е во должина од 1,5 километар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.